2025ء میں موسیقی کا جادو سر چڑھ کر بولا، ملک بھر میں سُر سنگیت کی برسات
https://jang.com.pk/assets/uploads/updates/2025-12-31/1542623_6542203_Music2025Pak_updates.jpgتصویر بشکریہ، آرٹس کونسل کراچی، فیس بکرواں برس موسیقی کا جادو سر چڑھ کر بولا اور سُرسنگیت کی برسات ہوتی رہی، کراچی، لاہور اور اسلام آباد میں یادگار محافل موسیقی کا انعقاد کیا گیا۔
2025ء میں پاکستان آئیڈل سب سے بڑا مقبول میوزیکل پروگرام ثابت ہوا، بین الاقوامی شہرت یافتہ گائیک استاد راحت فتح علی خان، عاطف اسلم، علی ظفر، صنم ماروی، حدیقہ کیانی، میشا شفیع اور سجاد علی نے کراچی سمیت ملک بھر میں درجنوں کنسرٹس کیے۔
آرٹس کونسل کے زیر اہتمام منعقدہ ورلڈ کلچر فیسٹیول میں مختلف ممالک کے سینکڑوں فنکاروں نے40 روز تک اپنے فن کا مظاہرہ کیا، قوالی نائٹس اور شہرت یافتہ سنگرز کے کنسرٹس کے مابین مقابلہ رہا۔
بلوچستان سے تعلق رکھنے والے بزرگ بینجو نواز استاد نور بخش کی مقبولیت میں غیر معمولی اضافہ ہوا۔
تفصیلات کے مطابق رواں برس ملک اور بیرون ممالک میں پاکستان آئیڈل کے چرچے رہے، اس پروگرام کے ججز میں استاد راحت فتح علی خان، بالی ووڈ اور پاکستانی فلموں کے ہیرو فواد خان، بلال مقصود اور زیب توجہ کا مرکز بنے رہے۔
ابھی شو ختم نہیں ہوا، نئے سال میں بھی پاکستان آئیڈل پوری آب و تاب کے ساتھ جاری و ساری رہے گا، سب کو انتظار ہے کہ پاکستان آئیڈل کا تاج کس خوش نصیب فنکار کے سر سجے گا۔
مقابلہ سخت ہے، ایک سے بڑھ کر ایک آوازیں سامنے آرہی ہیں، نئے نسل کو ایک اور بڑا گائیک ملنے والا ہے، پروگرام کے جج استاد راحت فتح علی خان کا کہنا ہے کہ پاکستان آئیڈل میں انصاف کے تقاضے پورے کیے جا رہے ہیں۔
فلم اسٹار فواد خان کا کہنا ہے کہ میں بطور جج اس بڑے پروگرام کو بے حد انجوائے کر رہا ہوں، دوسری جانب رواں برس ملک بھر میں سُر سنگیت کی بارش ہوتی رہی، سب سے زیادہ پروگرام جشن آزادی معرکہ حق کے موقع پر ہوئے۔
سندھ گورنمنٹ اور گورنر ہاؤس کے تحت شاندار میوزیکل کنسرٹس ہوئے، گورنر سندھ کامران خان ٹیسوری نے جشن آزادی کے موقع پر بین الاقوامی شہرت یافتہ گائیک استاد راحت فتح علی، عاطف اسلم اور علی ظفر کے بڑے کنسرٹس منعقد کیے، جس میں ہزاروں شائقین موسیقی نے شرکت کی۔
گورنر سندھ نے حیدرآباد میں بھی علی ظفر کے زبردست میوزیکل کنسرٹ کا انعقاد کیا۔
دوسری جانب سندھ حکومت نے آرٹس کونسل کے تعاون سے نیشنل اسٹیڈیم میں غیر معمولی میوزیکل پروگرام سجایا، جس میں ایک ہی نائٹ میں بین الاقوامی شہرت یافتہ فنکاروں نے پرفارمنس دی۔
استاد راحت فتح علی خان، عاطف اسلم، سجاد علی، حدیقہ کیانی، طفیل سنجرانی اور دیگر فنکاروں نے خُوب رنگ جمایا۔
عاطف اسلم نے اپنے والد کے انتقال کے باوجود بھی نیشنل اسٹیڈیم میں لاجواب پرفارمنس دی، ان کے اس اقدام کو بے حد سراہا گیا کہ انہوں نے والد کے انتقال کے باوجود اپنی کمٹمنٹ پوری کی۔
سندھ گورنمنٹ نے کنسرٹس کا سلسلہ کراچی تک محدود نہیں رکھا، حیدرآبادمیں بھی استاد راحت فتح علی خان کا کنسرٹ ہوا، رانی باغ کے کنسرٹ میں 50 ہزار سے زائد شائقین موسیقی نے شرکت کی۔
اسی طرح سکھر میں بھی سندھ حکومت کے پروگرام کو شاندار پذیرائی ملی۔
دوسری جانب ملک بھر میں قوالی نائٹس اور میوزیکل کنسرٹس کے مابین زبردست مقابلہ دیکھنے میں آیا۔ شادی بیاہ کی تقریبات میں قوالی نائٹس کا انعقاد سب سے زیادہ ہوا۔ چھوٹے بڑے سب ہی قوال گروپ، بے حد مصروف رہے۔
پی این سی اے اسلام آباد، الحمراءآرٹس کونسل لاہور میں بھی شفقت امانت علی، راحت فتح علی خان، علی ظفر، سجاد علی اور صنم ماروی کے کنسرٹس کو بے حد پسند کیا گیا۔
Pages:
[1]