کابینہ کی منظوری کے بعد 24 گھنٹوں کے اندر جنگ بندی کا نفاذ شروع ہوگا: ترجمان اسرائیلی حکومت

slotcosino

  فائل فوٹو  

اسرائیلی حکومت کی ترجمان شوش بیڈروسیان نے کہا ہے کہ غزہ جنگ بندی معاہدے کی توثیق کےلیے کابینہ کے اجلاس کے بعد 24 گھنٹوں کے اندر غزہ میں جنگ بندی کا آغاز ہو جائے گا۔

بیڈروسیان نے ایک پریس کانفرنس کے دوران بتایا کہ اسرائیل نے آج صبح مصر میں معاہدے کے حتمی مسودے پر دستخط کر دیے ہیں۔   
معاہدے کی خبر سننے کے بعد غزہ میں خوشی کی لہر، سجدہ شکر، اللّٰہ اکبر کے نعرے لگائے

غزہ میں بھی فلسطینیوں میں معاہدے کی خبر سننے کے بعد خوشی کی لہر دوڑ گئی، سجدہ شکر، ادا کیا گیا، اللّٰہ اکبر کے نعرے لگائے گئے۔   

ترجمان کے مطابق معاہدے میں طے پانے والے نکات کے تحت جنگ بندی نافذ ہونے کے بعد 72 گھنٹوں کی مدت شروع ہوگی، جس کے دوران قیدیوں اور یرغمالیوں کا تبادلہ عمل میں لایا جائے گا۔

انہوں نے کہا کہ حماس رہنما مروان برغوثی رہائی کے معاہدے کا حصہ نہیں ہیں، یرغمالیوں کی رہائی کے بعد اسرائیلی فوج غزہ کے 53 فیصد حصے پر کنٹرول رکھے گی۔  

دوسری جانب فلسطینی مزاحمتی تحریک حماس کا کہنا ہے کہ اسرائیل جنگ بندی معاہدے کی شرائط میں ’’ہیرا پھیری‘‘ کر رہا ہے۔   
اسرائیلی فوج نے غزہ کے اندرونی علاقوں سے پیچھے ہٹنے کی تیاری شروع کردی

عرب میڈیا کا کہنا ہے کہ جنگ بندی معاہدے کے پہلے مرحلے میں اسرائیلی فوج متفقہ لائنز پر چلی جائے گی۔   

حماس کا کہنا ہے کہ اسرائیل جنگ بندی معاہدے کے طے شدہ اقدامات اور طریقۂ کار میں جان بوجھ کر رد و بدل کر رہا ہے۔

الجزیرہ عربی سے گفتگو کرتے ہوئے حماس کے ترجمان حازم قاسم نے کہا کہ اسرائیل نے معاہدے میں طے شدہ تاریخوں، فہرستوں اور بعض کارروائیوں میں تبدیلیاں شروع کر دی ہیں۔

ان کا کہنا تھا کہ نیتن یاہو یہ سب صرف اس لیے کر رہا ہے تاکہ یہ تاثر دیا جاسکے کہ تمام معاملات پر کنٹرول اور فیصلہ سازی صرف اسی کے ہاتھ میں ہے۔

قاسم نے مزید کہا کہ ہم ثالثوں کے ساتھ مسلسل رابطے میں ہیں تاکہ قابض قوت کو اس بات کا پابند بنایا جائے کہ وہ طے شدہ شرائط پر عمل کرے اور ٹال مٹول سے باز رہے۔ آج دوپہر میں جنگ بندی کے اعلان پر بات ہوئی تھی، لیکن اسرائیل نے اندرونی وجوہات کی بنا پر اس اعلان کو مؤخر کر دیا۔

حماس کا کہنا ہے کہ ہم یہ واضح کرتے ہیں کہ قابض قوت کو معاہدے کی تمام شقوں پر عمل کرنا ہوگا اور ہم ثالث ممالک سے مطالبہ کرتے ہیں کہ وہ اسرائیل کو اس کا پابند بنائیں۔