بھارتی کرکٹ ٹیم کے سابق کپتان ویرات کوہلی نے جنوبی افریقہ کے خلاف پہلے ون ڈے میں شاندار سنچری اسکور کرنے کے بعد ٹیسٹ کرکٹ میں ممکنہ واپسی سے متعلق تمام افواہوں کی تردید کر دی۔
بھارتی میڈیا رپورٹس میں دعویٰ کیا جا رہا تھا کہ بی سی سی آئی کوہلی کے ٹیسٹ کرکٹ میں یو ٹرن اور ممکنہ کم بیک پر بات چیت کر سکتی ہے۔ تاہم میچ کے بعد گفتگو کرتے ہوئے 37 سالہ کوہلی نے واضح کر دیا کہ وہ صرف ایک فارمیٹ ہی کھیلیں گے اور ٹیسٹ کرکٹ میں واپسی کا کوئی امکان نہیں۔
کوہلی نے کہا کہ میں 37 سال کا ہوں اور ریکوری کے لیے وقت چاہیے، میں اب صرف ایک ہی فارمیٹ کھیل رہا ہوں، 300 سے زیادہ میچ کھیلنے کے بعد آپ کو معلوم ہو جاتا ہے کہ آپ کی ریفلیکسز اور فٹنس کہاں کھڑی ہے۔
ویرات کوہلی نے سب سے زیادہ سنچریاں بنا کر ٹنڈولکر کا ریکارڈ توڑ دیا
37 سالہ کوہلی نے مارکو جانسن کی گیند پر چوکا مار کر اپنی 52ویں ون ڈے سنچری مکمل کی اور بیٹ اٹھا کر شائقین کے جوش و خروش کا جواب دیا
انہوں نے بتایا کہ جب تک آپ اچھی کرکٹ کھیل رہے ہیں، ذہنی طور پر تیار ہیں اور جسمانی طور پر فٹ ہیں، تب تک کھیل جاری رہتا ہے۔
اس سے قبل بی سی سی آئی کے سیکریٹری دیوجیت سائقیا نے بھی ان خبروں کو بےبنیاد قرار دیا تھا۔
ان کا کہنا تھا کہ ویرات کوہلی کے بارے میں جو کچھ کہا جا رہا ہے وہ صرف افواہ ہے، اس حوالے سے کوئی بات چیت نہیں ہوئی۔
واضح رہے کہ کوہلی نے رواں برس مئی میں ٹیسٹ کرکٹ کو الوداع کہا تھا، ان کے ٹیسٹ کیریئر میں 123 ٹیسٹ میچز، 9 ہزار 230 رنز اور 30 سنچریاں شامل ہیں۔
Post time 2025-12-1 20:03:20
-- تصویر: بھارتی میڈیا 
