چیئرمین پی ٹی آئی بیرسٹر گوہر کا کہنا ہے کہ ہماری گورنر کے پی سے درخواست ہے کہ وہ علی امین گنڈاپور کا وزارتِ اعلیٰ سے استعفیٰ قبول کریں تاکہ بہتر انداز میں ٹرانزیشن ہو۔
بیرسٹر گوہر نے سینیٹر علی ظفر کے ہمراہ اڈیالہ جیل کے باہر میڈیا سے گفتگو کرتے ہوئے کہا کہ کافی دنوں بعد بانیٔ پی ٹی آئی سے ملاقات ہوئی ہے، وہ ٹھیک اور ہائی اسپرٹ میں ہیں۔
انہوں نے کہا کہ بانیٔ پی ٹی آئی کے خلاف توشہ خانہ کیس ٹو کا ٹرائل مکمل ہو گیا ہے، 13 اکتوبر کو حتمی دلائل ہوں گے، امید ہے منگل بدھ تک فیصلہ آئے گا، بانیٔ پی ٹی آئی کے خلاف یہ پانچواں بوگس کیس ہے۔
اگر میں استعفیٰ دے دوں تو تحریک انصاف کا وجود ختم ہوجائے گا، بیرسٹر گوہر
پی ٹی آئی کے چیئرمین بیرسٹر گوہر علی خان نے کہا ہے کہ اگر آج میں اپنی سیٹ سے استعفٰی دے دوں تو تحریک انصاف کا وجود ختم ہوجائے گا۔
بیرسٹر گوہر کا کہنا ہے کہ یہ سارے کیسز سیاسی ہیں تاکہ بانیٔ پی ٹی آئی کو اندر رکھا جائے، نئے وزیرِ اعلیٰ کے منصب سنبھالنے کے بعد بانیٔ پی ٹی آئی کابینہ کے نام فائنل کریں گے، بانیٔ پی ٹی آئی نے پنجاب اسمبلی کی قائمہ کمیٹیوں سے فوری مستعفی ہونے کی ہدایت کی ہے۔
ان کا کہنا ہے کہ پنجاب میں پی ٹی آئی کے پاس 14 قائمہ کمیٹیاں ہیں، نیا وزیرِ اعلیٰ وہی ہے جو بانیٔ پی ٹی آئی نے نامزد کیا، ہماری پارٹی میں کوئی فارورڈ بلاک نہیں، وزیرِ اعلیٰ کی تبدیلی پر میرے ساتھ کوئی ڈسکشن نہیں ہوئی۔
چیئرمین پی ٹی آئی نے کہا کہ بہت سارے فیصلوں پر بانیٔ پی ٹی آئی مشورہ نہیں کرتے، وزیرِ اعلیٰ کی تبدیلی بانیٔ پی ٹی آئی کا فیصلہ ہے جو پارٹی کو قبول ہے۔
اس موقع پر سینیٹر علی ظفرنے کہا کہ بانیٔ پی ٹی آئی نے کہا کہ کابینہ فی الحال یہ ہی چلے گی آگے دیکھ لیں گے اگر کوئی تبدیلی کرنی پڑی، بانیٔ پی ٹی آئی نے کہا کہ وزیرِ اعلیٰ کی تبدیلی ایک آئینی عمل ہے، آئینی عمل میں اگر کسی نے رکاوٹ ڈالی تو بھر پور احتجاج کریں گے۔
Post time 2025-10-10 09:54:40
چیئرمین پی ٹی آئی بیرسٹر گوہر—فائل فوٹو 
