پاکستان فلم انڈسٹری کے سینئر ہدایتکار اور مصنف سید نور نے اداکارہ ریشم اور سعود قاسمی کی تنقید کا جواب دے دیا۔
سید نور کئی کامیاب فلموں کے خالق ہیں، حال ہی میں ایک پوڈ کاسٹ میں شریک ہوئے جہاں انہوں نے اپنے خلاف کی جانے والی باتوں پر کھل کر گفتگو کی۔
ریشم کے بیان پر ردعمل دیتے ہوئے سید نور نے کہا کہ اگر ریشم کے میرے ساتھ نہ رہنے سے میرا نقصان ہوا، تو وہ خود بطور اداکارہ کہاں تک پہنچیں؟ اُن کی پہلی پانچ فلمیں جو میرے ساتھ تھیں، سب سپر ہٹ تھیں۔ ’دوپٹہ جل رہا ہے‘، ’گھونگھٹ‘، ’جیوا‘ سب کامیاب رہیں لیکن وہ ہر کردار کے لیے موزوں نہیں تھیں، اسی لیے میں نے دوسرے اداکاروں کے ساتھ کام شروع کیا۔
انہوں نے کہا کہ جب میں نے اُنہیں کاسٹ کرنا بند کیا تو اُن کی کوئی بڑی فلم سامنے نہیں آئی، میں نے اُن کا کیریئر بنانے کے لیے بہت محنت کی، لیکن یہ کبھی نہیں بتاؤں گا کہ میں نے اُنہیں کیسے گروم کیا۔
سید نور، اداکارہ صائمہ کی محبت میں کب گرفتار ہوئے؟ فلمساز نے بتا دیا
معروف پاکستانی فلمساز سید نور نے اہلیہ و اداکارہ صائمہ سے محبت کی داستان سنا دی۔
سید نور نے مزید کہا کہ ریشم کے بعد بھی میں نے کئی کامیاب فلمیں دیں، اس لیے یہ کہنا غلط ہے کہ اُن کے جانے سے میرا نقصان ہوا۔
اداکار سعود قاسمی کے تبصرے پر بات کرتے ہوئے سید نور نے کہا کہ میرا نہیں خیال کہ سعود کا مقصد مجھے برا کہنا تھا، اگر وہ ایسا کہنا بھی چاہتے تھے تو میں یہی سمجھوں گا کہ اُن کا ایسا کوئی ارادہ نہیں تھا، میں جانتا ہوں انہوں نے ایسا کیوں کہا، شاید ان کا مطلب یہ تھا کہ جب سید نور اور شان شاہد فلموں سے دور ہوئے تو انڈسٹری کمزور ہوگئی۔
انہوں نے مزید کہا کہ سعود اور ریشم دونوں میرے بچوں کی طرح ہیں، میں ان کی تنقید پر ناراض نہیں ہوتا، جو لوگ آپ کے مقام تک نہیں پہنچ پاتے، وہ لازمی بات کرتے ہیں، سعود ایک اچھے اداکار ہیں اور انہیں اپنی رائے رکھنے کا پورا حق ہے۔
Post time 2025-10-10 09:51:26
