|
|
 اسکرین گریب : جیو نیوز
خیبر پختونخوا کے ضلع بنوں میں پولیس نے دہشتگردی کا بڑا منصوبہ ناکام بنا دیا، نواحی علاقے بسیہ خیل میں واقع پل کو اڑانے کی کوشش ناکام بنا دی گئی۔
دہشتگردوں نے 8 سے 10 کلو گرام بارود سے بھری بالٹی سے بنی دیسی آئی ای ڈی کو پل کے مرکزی ستون سے منسلک کر رکھا تھا، جسے بم ڈسپوزل اسکواڈ نے بروقت ناکام بنا دیا جس کے باعث عوامی انفرااسٹرکچر تباہی سے محفوظ رہا۔
اہل علاقہ نے بنوں پولیس کی بروقت کارروائی کی تعریف کرتے ہوئے شر پسند عناصر کے خلاف مکمل تعاون کا یقین دلایا۔
دوسری جانب سیکیورٹی فورسز اور قانون نافذ کرنے والے اداروں نے ضلع بنوں میں مشترکہ آپریشن کرتے ہوئے بھارتی حمایت یافتہ فتنہ الخوارج کے 8 دہشت گرد ہلاک کردیے۔
آئی ایس پی آر کے مطابق سیکورٹی فورسز نے کارروائی کے دوران خوارج کے ٹھکانے کو مؤثر طریقے سے نشانہ بنایا۔
صدر مملکت آصف زرداری، وزیر اعظم شہباز شریف اور وفاقی وزیر داخلہ محسن نقوی نے بنوں میں بھارتی اسپانسرڈ دہشت گردوں کے خلاف کامیاب آپریشن پر سیکیورٹی فورسز کو خراجِ تحسین پیش کیا۔
اس سے پہلے بنوں ریجن میں سیکیورٹی فورسز کے مختلف علاقوں میں آپریشنز میں 3 اہم کمانڈرز سمیت 17 دہشتگرد ہلاک ہوئے۔
سینٹرل پولیس آفس کے مطابق آپریشنز میں پولیس اور سیکیورٹی فورسز محفوظ رہے، آپریشن کے دوران اہل علاقہ کا بھرپور تعاون حاصل رہا۔ |
|
Post time 2025-11-22 22:51:13