پی ٹی آئی نے مذاکراتی کمیٹی کی سربراہی کا صرف بیان دیا، رابطہ نہیں کیا: مولانا فضل الرحمٰن

slotcosino

جمیعت علمائے اسلام کے سربراہ مولانا فضل الرحمٰن کا کہنا ہے کہ  پی ٹی آئی نے مذاکراتی کمیٹی کی سربراہی کا صرف بیان دیا، رابطہ نہیں کیا۔

چکوال میں میڈیا سے گفتگو کرتے ہوئے مولانا فضل الرحمٰن نے کہا کہ جعلی مینڈیٹ کے ہوتے ہوئے بھی حکومت صرف مسلم لیگ ن کی ہے، پیپلز پارٹی صرف سہارا ہے، آئین کے خلاف قانون سازی کے بعد ان کا مینڈیٹ خود بخود ختم ہو جاتا ہے۔   
ہمیں دھمکی دیتے ہیں فورتھ شیڈول میں ڈال دیں گے، بھاڑ میں جائے فورتھ شیڈول، فضل الرحمان

فضل الرحمان نے کہا کہ ہمیں قومی دائرے میں آنے کا کہا جاتا ہے، یہ کہتے ہیں ہم تو علماء کو 25 ہزار روپے دینا چاہتے ہیں، علماء کو سپورٹ کرنا چاہتے ہیں، یہ کس مد میں ملا کے ضمیر کو خریدنا چاہتے ہو۔   

انہوں نے کہا کہ غیر اسلامی قانون سازی کے خلاف 22 تاریخ کو علماء اکٹھے ہو رہے ہیں، آئین ملی میثاق ہے، 26 ویں ترمیم میں بات چیت چلتی رہی ہے، ترمیم مفاہمت کے ساتھ اسمبلی میں پیش ہوئی، 27 ویں ترمیم جبری طور پر طاقت سے دو تہائی اکثریت سے منظور کروائی گئی۔

مولانا فضل الرحمٰن نے کہا کہ ہم نے اس آئین کا حلف اٹھایا ہوا ہے، غیر اسلامی قانون سازی کے خلاف 22  دسمبر کو کراچی میں آل پارٹیز کانفرنس ہے، آئین کے خلاف قانون سازی کا مطلب ہے وہ آئین کی مخالفت کا ارتکاب کریں گے،  فاٹا کے انضمام کی ہم مخالفت کرتے رہے، اس کےانجام اور نقصان سے آگاہ کرتے رہے۔   
ہمیں افغانستان کو ساتھ ملانا چاہیے تھا بجائے کہ وہ بھارت جاتا، فضل الرحمان

سربراہ جے یو آئی نے کہا کہ ملک میں کچھ نہیں ہو رہا لیکن کارکن تیاری کریں، علماء کرام کو 25 ہزار وظیفہ دینے کو مسترد کرتے ہیں، یہ 25 لاکھ بھی دیں تو ان کے کنٹرول میں نہیں آنے والے۔   

سربراہ جے یو آئی نے کہا کہ عقل کل سمجھنے والے آج کہتے ہیں کہ وہ بھی غلط ہوا تھا، آج یہ کہتے ہیں کہ موجودہ صوبوں کو بھی تقسیم کر دیں، تدبیر اور تدبر کا مطلب ہے معاملات کے انجام پر نظر رکھنا، یہ کرنے کے بعد کہتے ہیں کہ ہم طاقت ور ہیں جو ہم سوچیں گے وہی ہو گا، طاقت کی بنیاد پر فاٹا کا انضمام کیا گیا، مسلح گروہ نے قبضہ کر لیا۔