|
|
برطانیہ نے نئے اسائلم قواعد پر عمل نہ کرنے والے ممالک کے خلاف کارروائی کا عمل شروع کرتے ہوئے ریپبلک آف کانگو پر ویزا پابندیاں لگانے کا فیصلہ کیا ہے۔
برطانیہ نے یہ فیصلہ ریپبلک آف کانگو کی حکومت کے غیرقانونی تارکین وطن اور مجرموں کو واپس لینے کے اقدامات پر اتفاق نہ کرنے پر کیا۔
وزراء کے مطابق ریپبلک آف کانگو برطانیہ کے نومبر میں اعلان کردہ اسائلم کے نئے قواعد کے تحت تبدیلیاں لانے میں ناکام رہا ہے۔
رپورٹ کے مطابق ریپبلک آف کانگو کے شہری فاسٹ ٹریک ویزا کے لیے بھی رجوع نہیں کرسکیں گے، سیاستدانوں اور وی آئی پیز کو برطانیہ آنے پر ترجیحی سلوک کی سہولت بھی نہیں ملے گی۔
برطانوی میڈیا کے مطابق انگولا اور نمیبیا اپنے شہریوں کو واپس لینے کی کوششوں کو تیز کرنے پر اتفاق کرنے کے سبب ویزا پابندیوں سے بچ گئے ہیں۔
حکومتی ذرائع کے مطابق ہوم سیکریٹری شبانہ محمود اسائلم قواعد کی پابندیوں سے اتفاق نہ کرنے والے دیگر ممالک پر بھی پابندیاں لگانے میں تاخیر نہیں کریں گی۔
حکومت نے پہلے ہی متنبہ کیا تھا کہ وہ نئے اسائلم قواعد پر عمل نہ کرنے پر انگولا، نمیبیا اور ریپبلک آف کانگو پر پابندیاں لگا دے گا۔
ہوم آفس کے مطابق نئے معاہدوں کی صورت میں ہزاروں افراد کو ملک بدر کیا جاسکتا ہے، اصلاحات کے سبب پناہ گزینوں کو عارضی ریفیوج اسٹیٹس دیا جائے گا جبکہ انہیں رہائش کی فراہمی کی ضمانت بھی نہیں ہوگی۔
ہوم سیکریٹری نے اپنے شہریوں کو واپس نہ لینے والے ممالک پر ویزا پابندیاں اور ویزا ’ایمرجنسی بریک‘ لگانے کا انتباہ بھی دیا تھا۔ |
|
Post time 2025-12-29 15:28:05