|
|
قومی اسپورٹس پالیسی کی خلاف ورزی کرنے پر پاکستان اسپورٹس بورڈ نے 3 ملکی فیڈریشنز کو آخری نوٹس جاری کرتے ہوئے عہداروں کو 7 روز میں دستبردار ہونے کی ہدایت کی ہے بصورت دیگر ان پر پابندی لگادی جائے گی۔
پاکستان اسپورٹس بورڈ نے اسپورٹس پالیسی پر عمل نہ کرنے پر ملک کی 3 اسپورٹس فیڈریشنز کے سینئر عہدیداران کو آخری نوٹس جاری کر دیا ہے۔
جیو نیوز نے پی ایس بی کا نوٹیفکیشن حاصل کرلیا، جس کے مطابق پاکستان جوڈو فیڈریشن، پاکستان تائیکوانڈو فیڈریشن اور پاکستان سیلنگ فیڈریشن کے بعض عہدیداران مقررہ مدت سے زائد عرصے تک اپنے عہدوں پر فائز ہیں۔
اسپورٹس پالیسی کے تحت کوئی بھی عہدے دار 4، 4 سال کی 2 ٹرم مکمل کرنے کے بعد پھر اپنے عہدے پر فائض نہیں رہ سکتا، لیکن تینوں فیڈریشنز کے بعض عہداران قومی اسپورٹس پالیسی کی مکمل خلاف ورزی کررہے ہیں، اس ضمن میں پاکستان اسپورٹس بورڈ کی جانب سے متعدد بار تحریری مراسلے ارسال کیے گئے۔
نوٹس میں کہا گیا ہے کہ متعلقہ عہدیداران 7 دن کے اندر اندر اضافی مدت میں رکھے گئے عہدوں سے دستبردار ہو جائیں۔ بصورت دیگر پاکستان اسپورٹس بورڈ مزید کسی نوٹس کے بغیر ان پر پابندی عائد کرنے کا مجاز ہوگا۔
پی ایس بی کے مطابق پابندی کی صورت میں متعلقہ افراد کسی بھی قومی یا بین الاقوامی کھیلوں کی سرگرمی میں شرکت، نمائندگی یا وابستگی کے اہل نہیں رہیں گے۔
اس کے ساتھ وہ کسی بھی قسم کی مالی معاونت، کھیلوں کی سہولیات، آلات، یا پاکستان اسپورٹس بورڈ سے منسلک کسی بھی ادارے یا فیڈریشن سے تعلق قائم نہیں کر سکیں گے۔
نوٹس میں تمام محکموں، فیڈریشنز اور اسپورٹس اداروں کو بھی ہدایت کی گئی ہے کہ وہ پابندی کی صورت میں ان عہدیداران کے ساتھ کسی قسم کا تعاون یا خط و کتابت نہ کریں۔ |
|
Post time 2025-12-29 23:16:05