|
|
 فوٹو: پی آئی ڈی
وزیراعظم شہباز شریف سے پاکستان میں تعینات سعودی عرب کے سفیر نواف بن سعید احمد المالکی نے ملاقات کی۔
وزیراعظم ہاؤس میں ہونے والی ملاقات کے دوران وزیراعظم نے خادم حرمین شریفین شاہ سلمان بن عبدالعزیز اور سعودی وزیراعظم ولی عہد شہزادہ محمد بن سلمان بن عبدالعزیز کے لیے احترام اور نیک خواہشات کا اظہار کیا۔
اس موقع پر وزیراعظم نے دونوں ملکوں کے دیرینہ برادرانہ تعلقات کو مزید گہرا کرنے کے عزم کا اعادہ کیا۔
انہوں نے ضرورت کے وقت سعودی عرب کی جانب سے پاکستان کی مسلسل حمایت اور علاقائی امن و استحکام کے فروغ میں سعودی عرب کے تعمیری کردار کو سراہا۔
ملاقات میں حالیہ علاقائی اور عالمی پیش رفت پر تبادلہ خیال کیا گیا۔
وزیراعظم نے مذاکرات اور سفارتکاری کے ذریعے امن و استحکام کو برقرار رکھنے کی ضرورت پر زور دیا۔
سعودی سفیر نے شاہ سلمان بن عبدالعزیز اور ولی عہد شہزادہ محمد بن سلمان کی جانب سے وزیراعظم کو تہنیتی پیغام پہنچایا۔ |
|
Post time 2026-1-1 02:00:25