شکارپور میں ریلوے ٹریک پر دھماکے سے جعفر ایکسپریس کی 4 بوگیاں پٹری سے اتر گئیں۔
ریلوے ٹریک پر دھماکے کے باعث ٹرینوں کی آمدورفت عارضی طور پر معطل ہو گئی۔
پولیس کے مطابق واقعے میں 4 مسافر زخمی ہو گئے۔ جنہیں اسپتال منتقل کر دیا گیا ہے۔
کوئٹہ سے پشاور جانے والی جعفر ایکسپریس 2 روز کیلئے منسوخ
ریلوے حکام کے مطابق جعفر ایکسپریس آج اور کل پشاور نہیں جائے گی۔
اس حوالے سے ایس ایس پی شاہزیب چاچڑ کا کہنا ہے کہ دھماکے کی نوعیت جاننے کے لیے بم ڈسپوزل اسکواڈ طلب کر لی گئی ہے اور تفتیش جاری ہے۔
انہوں نے کہا کہ مسافروں کو بسوں کے ذریعے بھیجنے کے انتظامات کیے جا رہے ہیں۔
دوسری جانب ریلوے حکام کا کہنا ہے کہ متاثرہ ٹریک کی مرمت کام شروع کر دیا گیا ہے۔ ٹریک کی مرمت میں 8 سے 10 گھنٹے تک لگ سکتے ہیں۔
وزیراعلیٰ سندھ مراد علی شاہ نے کوٹ سلطان کے قریب ریل کی پٹڑی پر دھماکے کی مذمت کرتے ہوئے آئی جی پولیس سے واقعے کی مکمل رپورٹ طلب کر لی۔
ترجمان وزیراعلیٰ سندھ کے مطابق وزیراعلیٰ سندھ نے کمشنر لاڑکانہ کو زخمی مسافروں کو بہترین طبی امداد دینے کی ہدایت کرتے ہوئے کہا کہ ریسکیو ٹیموں کو بھیج کر متاثرہ مسافروں کو بروقت امداد فراہم کی جائے۔
دوسری جانب وزیر داخلہ سندھ ضیاء الحسن لنجار نے ایس ایس پی شکارپور سے تفصیلات طلب کرتے ہوئے کہا کہ فی الفور واقعہ کی تفتیش کا آغاز کریں۔
ضیاء الحسن لنجار کا کہنا تھا کہ ریلوے ٹریک کو نقصان پہنچانے والے دہشت گردوں کو جلد گرفتار کیا جائے۔
Post time 2025-10-10 09:52:27
’جیو نیوز‘ گریب 
