|
|
 — فائل فوٹو
پاکستانی معروف اداکارہ ہانیہ عامر نے اپنی طلاق کی پیش گوئی پر نجومیوں کو طنزیہ ردعمل دے دیا۔
فوٹوز اینڈ ویڈیوز شیئرنگ پلیٹ فارم انسٹاگرام پر اداکارہ نے ایک وائرل کلپ ری شیئر کیا۔
مختلف سوشل میڈیا پلیٹ فارمز پر وائرل ہونے والا یہ مختصر ویڈیو کلپ نجی ٹی وی چینل کے پروگرام کا ہے، جس میں نجومیوں نے پیش گوئی کی کہ ہانیہ عامر اگر رواں سال 2026ء میں ازدواجی رشتے میں منسلک ہوتی ہیں تو مستقبل میں انہیں طلاق کا سامنا کرنا پڑسکتا ہے۔
اس پیش گوئی پر ردِعمل دیتے ہوئے ہانیہ عامر نے انسٹاگرام پر اسٹوری شیئر کی، جس میں انہوں نے لکھا کہ ’عجیب، پہلے شادی تو ہونے دو‘۔ 
دوسری جانب مداح سوشل میڈیا پر ہانیہ عامر اور گلوکار و اداکار عاصم اظہر کی شادی سے متعلق قیاس آرائیاں کر رہے ہیں، تاہم اب تک اس حوالے سے کوئی باضابطہ تصدیق سامنے نہیں آئی۔
گزشتہ سال عاصم اظہر کی میرب علی سے علیحدگی کے بعد سے سوشل میڈیا پر گلوکار کے اور ہانیہ عامر کے دوبارہ قریب آنے کی چہ مگوئیاں گردش کر رہی ہیں۔
یہ افواہیں اس وقت مزید پختہ ہو گئیں جب دونوں کو یشمٰی گل کی سالگرہ کی تقریب سمیت مختلف مواقع پر ایک ساتھ دیکھا گیا۔
عاصم اظہر کے سولو البم کی ریلیز کے بعد ان کے گانے ’ہانییا‘ نے صارفین کی توجہ حاصل کرلی، جس کے بعد مداحوں میں گلوکار اور اداکارہ کے تعلقات سے متعلق بحث نے زور پکڑ لیا۔ |
|
Post time