بھارتی اداکارہ ہمانشی کھرانا کو جان سے مارنے کی دھمکیاں دی گئی ہیں، لارنس بشنوئی گینگ نے ان سے 10 کروڑ روپے بھتہ مانگ لیا۔
بھارتی میڈیا کے مطابق لارنس بشنوئی گینگ کی جانب سے مبینہ دھمکی آمیز کال موصول ہونے کے بعد پولیس نے اداکارہ کی سیکیورٹی مزید سخت کر دی ہے۔
اداکارہ نے اپنی شکای میں مؤقف اختیار کیا کہ انہیں جمعہ سے جان سے مارنے کی دھمکیوں پر مبنی ای میلز موصول ہو رہی تھیں۔ ای میل بھیجنے والے نے خود کو ذیشان اختر ظاہر کرتے ہوئے 10 کروڑ روپے کا مطالبہ دہرایا اور ای میلز کے ساتھ آڈیو پیغامات بھی منسلک کیے۔
موہالی پولیس نے مقدمہ درج کرکے معاملے کی تحقیقات شروع کردی ہے، جبکہ پولیس کا کہنا ہے کہ دھمکی آمیز کال چندی گڑھ سے کی گئی اور اس کا تعلق بیرونِ ملک سے سرگرم گینگ نیٹ ورک سے جوڑا جا رہا ہے۔
سلمان کے بہنوئی ایوش شرما کو بشنوئی گینگ کی دھمکیاں
بالی ووڈ سپر اسٹار سلمان خان کے بہنوئی ایوش شرما کو بشنوئی گینگ کی جانب سے دھمکی آمیز ای میل موصول ہوا ہے۔ اطلاعات کے مطابق کچھ دن قبل اداکار رنویر سنگھ نے بھی اسی قسم کی دھمکی ملنے کی اطلاع دی تھی۔
قابل ذکر ہے کہ ذیشان اختر اس سے قبل بابا صدیق کے قتل کیس میں بھی مرکزی ملزم رہ چکا ہے اور اس کا نام متعدد ہائی پروفائل جرائم سے منسلک کیا جاتا رہا ہے۔
بھارتی میڈیا کے مطابق اس سے قبل بشنوئی گینگ نے فلم اور میوزک انڈسٹری کی کئی شخصیات کو نشانہ بنایا ہے، رنویر سنگھ اور فلمساز روہت شیٹھی کو بھی سنگین نتائج کی دھمکیاں دی گئی تھیں۔
Post time 2026-2-15 00:19:00
فوٹو: بھارتی میڈیا 
