|
|
ایک تحقیق سے معلوم ہوا ہے کہ سوشل میڈیا کا زیادہ استعمال تعلیمی صلاحیت میں کمی سے منسلک ہے۔ اس نئی تحقیق میں بتایا گیا ہے کہ انٹرنیٹ کا زیادہ استعمال آپ کے نوجوان بچوں کی دماغی صلاحیت و قوت کو نقصان پہنچا سکتا ہے۔
منگل کو جرنل آف دی امریکین میڈیکل ایسوسی ایشن میں رپورٹ ہونے والی اس تحقیق کے مطابق 9 سے 13 سال کی عمر کے بچوں نے جو سوشل میڈیا پر زیادہ وقت گزارتے ہیں، دو سال بعد یاداشت اور زبان کے ایک ٹیسٹ میں کافی خراب کارکردگی کا مظاہرہ کیا۔
اس تحقیقی ٹیم کے سربراہ اور یونیورسٹی آف کیلیفورنیا سان فرانسیسکو کے ایسوسی ایٹ پروفیسر آف پیڈیاٹرکس ڈاکٹر جیسن ناگاتا کے مطابق اس تحقیق سے یہ بات بھی سامنے آئی کہ سوشل میڈیا کے استعمال کی کم سطح بھی ذہنی کارکردگی پر منفی اثر مرتب کرتی ہے۔
ڈاکٹر جیسن ناگاتا کا مزید کہنا تھا کہ ہماری تحقیق کے نتائج سے پتہ چلتا ہے کہ نو عمر بچوں کا دماغ سوشل میڈیا کے اثرات کے حوالے سے بالخصوص حساس ہو سکتا ہے، جو اس بات کی اہمیت کو اجاگر کرتا ہے کہ ان پلیٹ فارمز کا ایکسپوژر عمر کے لحاظ سے موزوں انداز میں کروایا جائے اور ان کے استعمال کی محتاط نگرانی کی جائے۔
اس تحقیق کے لیے محققین نے 6,500 بچوں کی دماغی صلاحیت اور ڈیولپمنٹ کے اعداد وشمار کا تجزیہ کیا، یہ امریکا کی دماغی بڑھوتری کے حوالے سے سب سے بڑی اور طویل المدتی تحقیق تھی۔
تقریباً 58 فیصد بچے سوشل میڈیا پر بالکل بھی وقت نہیں گزارتے تھے، 37 فیصد بچے 13 سال کی عمر تک سوشل میڈیا پر روزانہ ایک اضافی گھنٹہ گزار رہے تھے اور 6 فیصد بچے 13 سال کی عمر تک روزانہ 3 اضافی گھنٹے تک سوشل میڈیا استعمال کر رہے تھے۔ نتائج سے ظاہر زیادہ وقت گزارنے والے بچوں پر اسکے منفی اثرات بھی زیادہ مرتب ہوئے۔ |
|
Post time 2025-10-16 02:09:05