وزیرِاعلیٰ سندھ سید مراد علی شاہ نے ایرانی سپریم لیڈر آیت اللّٰہ خامنہ ای کی شہادت پر گہرے دکھ کا اظہار کیا ہے۔
مراد علی شاہ کا کہنا ہے کہ دکھ کی گھڑی میں سندھ کی عوام ایران اور تمام سوگواران کے ساتھ برابر کی شریک ہے، امریکی قونصلیٹ پر انتہائی افسوسناک واقعہ ہوا جس سے انسانی جانیں ضائع ہوئیں۔
اُنہوں نے کہا کہ حکومت کسی کو قانون ہاتھ میں لینے کی اجازت نہیں دے سکتی، عوام کی جان و مال کی حفاظت حکومت کی اولین ترجیح ہے۔
وزیراعلیٰ سندھ نے امریکی قونصلیٹ واقعہ پر غیر جانبدارانہ تحقیقات کرنے کی ہدایت جاری کرتے ہوئے کہا کہ ملک جنگی صورتحال سے دوچار ہے، ایسے میں امن امان سبوتاژ کرنا مناسب نہیں۔
کراچی: امریکی قونصل خانے کے قریب ہنگامہ آرائی، فائرنگ سے 9 افراد جاں بحق
مظاہرین نے امریکی قونصل خانے میں داخل ہونے کی کوشش کی اور پتھراؤ کیا
اُنہوں نے مذہبی رہنماؤں، علامہ شہنشاہ نقوی، علامہ شبیر میثمی اور دیگر سے رابطہ کیا اور ان سے عوام کے جذبات کو ہر صورت قابو میں رکھنے کی درخواست کی۔
ترجمان وزیراعلیٰ سندھ کے مطابق علامہ شہنشاہ نقوی اور دیگر نے نمائش پر مجلس منعقد کرنے کی بات کی جس پر مراد علی شاہ نے انتظامیہ اور پولیس کو مجلس کو مکمل سیکیورٹی دینے کی ہدایت کر دی ہے۔
وزیراعلیٰ سندھ نے علماء اور مختلف مکتبہ فکر کے لوگوں کو امن کے لیے رہنمائی فراہم کرنے کی درخواست بھی کی۔
اُنہوں نے انتظامیہ اور پولیس کو امن وامان ہر صورت برقرار رکھنے کی ہدایت کرتے ہوئے عوام سے بھی امن و امان کے لیے ساتھ دینے کی درخواست کی ہے۔
Post time 2026-3-1 21:10:11
