پاکستان کی کم عمر نوبیل انعام یافتہ، تعلیم و خواتین کے حقوق کی علم بردار ملالہ یوسفزئی نے اقوامِ متحدہ میں خواتین اور بچوں کے لیے مساوی انصاف کا مطالبہ کر دیا۔
انہوں نے اقوامِ متحدہ کے تحت ہونے والے اقوامِ متحدہ کمیشن برائے خواتین کے افتتاحی اجلاس سے خطاب کرتے ہوئے دنیا بھر میں خواتین اور بچوں کے لیے مساوی انصاف کی ضرورت پر زور دیا۔
اپنے خطاب میں ملالہ یوسفزئی نے کہا کہ انسانی حقوق کا دارومدار کسی ملک کے محلِ وقوع یا سیاسی مفادات پر نہیں ہونا چاہیے۔
ان کا کہنا ہے کہ ہر انسان کو برابر کے حقوق ملنے چاہئیں، چاہے وہ دنیا کے کسی بھی حصے میں رہتا ہو۔
انہوں نے ایرانی شہر میناب میں کمسن بچیوں کے اسکول پر ہونے والے مبینہ فضائی حملے پر گہری تشویش کا اظہار کیا، جس میں طالبات اور اساتذہ سمیت 175 افراد شہید ہوئے تھے۔
ایران میں طالبات کے جاں بحق اور زخمی ہونے پر افسردہ ہوں، ملالہ یوسف زئی
ملالہ یوسفزئی نے کہا کہ شہریوں خصوصاً بچوں کی اموات ناقابل قبول ہے۔
ملالہ یوسفزئی نے متاثرہ خاندانوں کے ساتھ ہمدردی کا اظہار کرتے ہوئے عالمی برادری سے بچوں کے تحفظ کے لیے مؤثر اقدامات کرنے کی اپیل کی۔
ملالہ یوسفزئی نے عالمی رہنماؤں پر زور دیا کہ وہ غزہ، افغانستان اور ایران میں صنفی امتیاز کو انسانیت کے خلاف جرم کے طور پر تسلیم کریں اور خواتین کے حقوق کے تحفظ کے لیے مزید مضبوط اقدامات کریں۔
Post time 2026-3-10 17:43:48
