پاکستان شوبز انڈسٹری کی عالمی شہرت یافتہ اداکارہ صبا قمر کا کہنا ہے کہ ذہنی صحت اتنی اہم ہے جتنی جسمانی صحت اور اس کے بارے میں کھل کر بات کرنا کمزوری نہیں بلکہ مضبوطی کی علامت ہے۔
فوٹوز اینڈ ویڈیوز شیئرنگ پلیٹ فارم انسٹاگرام پر صبا قمر نے ذہنی صحت کی اہمیت و آگاہی سے متعلق ویڈیو پیغام جاری کیا ہے۔
ان کا کہنا ہے کہ امید ہے آپ سب خیریت سے ہوں گے، اکتوبر کا مہینہ عالمی ذہنی صحت کا مہینہ ہے، یہ وہ وقت جب آپ اپنے پیاروں سے رابطہ کریں، اسے بات چیت کریں، ان کی سنیں۔
انہوں نے کہا کہ ہم ذہنی صحت پر مکمل توجہ نہیں دیتے اور اگر دیتے ہیں تو اس سے منسلک بیماریوں کو چھپانے کی کوشش کرتے ہیں جبکہ اس چھپانے کی ضرورت نہیں ہے۔
اداکارہ نے ذہنی صحت کی اہمیت پر زور دیتے ہوئے اپنی ذہنی صحت کے بارے میں بھی بات کی اور کہا کہ دوسروں کی طرح میری اپنی جدو جہد بھی ہے، جب میں تناؤ محسوس کرتی ہوں تو کئی دن ایسے ہوتے ہیں جب مجھے سمجھ نہیں آتا کہ کس سے بات کروں لیکن وقت کے ساتھ ساتھ میں نے چند چیزیں سیکھی ہیں، جس نے میری بہت مدد کی۔
دل میں خلش ہو تو اظہار کردیں، چاہیں تو رولیں: صبا قمر
پاکستان کی صفِ اول کی اداکارہ صبا قمر نے ذاتی تجربے کی روشنی میں اپنے چاہنے والوں کو مشورہ دیا ہے کہ اگر دل میں کوئی رنج و غم، یا خلش ہو تو اسے دل میں دبا کے رکھنے کے بجائے اس کا اظہار کردیں کیونکہ یہ بوجھ آپ کی صحت کو متاثر کرتا ہے۔
انہوں نے بتایا کہ جس چیز نے میری مدد کی اس میں پہلی یہ کہ جب ضرورت محسوس ہو مدد مانگیں اس میں کوئی برائی نہیں ہے، دوسرا یہ جاننے کی کوشش کریں کہ آپ کے آس پاس وہ کون لوگ ہیں جو آپ کو اس معاملے میں سپورٹ کرسکتے ہیں۔
انہوں نے بات جاری رکھتے ہوئے کہا کہ تیسرا، اپنا معمول بنائیں۔ چھوٹی چھوٹی چیزوں کو اپنے معمول کا حصہ بنائیں اور چوتھا و آخری اپنے لیے وقت نکالیں چاہے زندگی جتنی بھی مصروف ہو اپنے آپ کے لیے وقت ضرور نکالیں کیونکہ آپ کی ذہنی صحت اہمیت رکھتی ہے اس کا خیال آپ نے خود رکھنا ہے۔
اپنے پیغام کے آخر میں انہوں نے ان تمام والدین، اساتذہ اور مینٹورز کا شکریہ ادا کیا جن کی وجہ سے ایک بچہ بھی ذہنی تناؤ سے باہر نکلا، جس نے اپنے ارد گرد موجود بچوں کی پریشانی سنی اور ان کی مدد کے لیے موجود رہے۔
Post time 2025-10-29 17:45:05
