|
|
حکومتی ذرائع کا کہنا ہے کہ غزہ کے معاملے پر مذہبی جماعت کے پُرتشدد احتجاج میں سرکاری املاک اور پولیس کی گاڑیوں کی توڑ پھوڑ کی گئی ہے اور پولیس اہل کاروں پر تشدد کیا گیا۔
احتجاج کی وجہ سے اسلام آباد اور راولپنڈی میں راستے بند ہیں، سڑکوں پر ایمبولینسیں پھنس گئیں، مریضوں کے گھر والے راستہ مانگتے رہے، ایک بچے کی والدہ رو رو کر دہائی دیتی رہی، لیکن اسپتالوں تک رسائی ناممکن ہوگئی، حالت خراب ہونے پر ایک اور ضعیف مریض کو ایمبولینس میں ہی ڈرپ لگائی گئی۔ تعلیمی اداروں کی بندش سے طلبہ پریشان ہیں۔
حکومتی ذرائع کے مطابق غزہ امن منصوبے پر غزہ سمیت تمام اسلامی ممالک میں خوشیاں منائی جارہی ہیں، جب کہ شرپسند جتھا احتجاج کر رہا ہے۔ 
مذہبی جماعت کا احتجاج، دوسرے روز بھی جڑواں شہروں میں معمولات زندگی بری طرح متاثر
راستوں کی بندش کے باعث جڑواں شہروں میں تجارتی سرگرمیاں بھی معطل ہیں جبکہ ایکسپریس وے، فیض آباد اور آئی جی پی روڈ بھی مکمل طور پر بند ہے۔ 
شہریوں کا کہنا ہے کہ ملک معاشی استحکام کی طرف جانے لگتا ہے تو فسادی ٹولا متحرک ہوجاتا ہے۔ یہ احتجاج سراسر “فساد فی الارض“ ہے۔
خیال رہے کہ مذہبی جماعت نے گزشتہ روز لاہور سے اسلام آباد کی طرف غزہ مارچ کا اعلان کیا تھا۔ غزہ مارچ کے شرکا اور پولیس کے درمیان جھگڑے میں متعدد افراد زخمی ہو گئے۔ زخمیوں میں پولیس اہل کار بھی شامل ہیں۔
لاہور میں اورنج لائن میٹرو ٹرین، میٹرو بس اور اسپیڈو بس سروس تیسرے روز بھی بند ہے جس سے شہریوں کو مشکلات کا سامنا ہے۔
اُدھر مذہبی جماعت کے احتجاج کے باعث اسلام آباد اور راولپنڈی میں راستے بند ہیں اور مری روڈ پر ایمبولینس پھنس گئی، مریض اور ان کے گھر والے پریشان ہیں، حالت خراب ہونے پر ایک ضعیف مریض کو ایمبولینس میں ہی ڈرپ لگائی گئی۔
کنٹینر کھڑے ہونے سے موٹر سائیکلوں کے گزرنے کے راستے بھی بند ہیں جس کے باعث شہریوں اور پولیس اہل کاروں میں تلخ کلامی بھی ہوئی۔ |
|
Post time 2025-10-11 22:54:11