|
|
 تصویر بشکریہ فیس بک، فیصل ممتاز راٹھور
آزاد کشمیر کے نامزد وزیراعظم فیصل ممتاز راٹھور کون ہیں؟ اور پیپلز پارٹی میں کب شامل ہوئے؟ قیادت میں سے کس کا اعتماد حاصل ہے؟
فیصل ممتاز راٹھور سابق وزیراعظم آزاد کشمیر ممتاز حسین راٹھور مرحوم کے فرزند ہیں، وہ 11 اپریل 1978ء کو راولپنڈی میں پیدا ہوئے۔
کنٹرول لائن پر واقع آزاد کشمیر کے دور افتادہ ضلع حویلی سے تعلق رکھنے والے فیصل ممتاز راٹھور اپنے والد کی طرح عوام میں گھل مل جانے والے اور متوسط طبقے کی نمائندگی کرنے والے شمار کیے جاتے ہیں، یہی وجہ ہے کہ عوامی ایکشن کمیٹی کی تحریک کے دوران بھی وہ مذاکراتی عمل کا حصہ رہے۔
ان کی ابتدائی تعلیم راولپنڈی میں مکمل ہوئی جبکہ پنجاب یونیورسٹی سے گریجویشن کے بعد وہ عملی سیاست میں شریک ہوئے۔
ایل اے 17 حویلی کہوٹہ سے پہلی بار 2006ء کے انتخابات میں حصہ لیا تاہم 2011ء کے انتخابات میں پیپلز پارٹی میں شمولیت اختیار کرنے کے بعد پہلی بار ممبر قانون ساز اسمبلی منتخب ہوئے۔
وہ دوسری بار 2021 کے انتخابات میں ممبر قانون ساز اسمبلی منتخب ہوئے اور اپوزیشن کا حصہ رہے، 2023 کے انتخابات میں کامیابی کے بعد چوہدری انوار الحق کی کابینہ کا حصہ اور عوامی ایکشن کمیٹی کے ساتھ مذاکراتی کمیٹی کے بھی سربراہ رہے۔
فیصل ممتاز راٹھور اپنی مدر پارٹی پاکستان پیپلز پارٹی کے چیئرمین بلاول بھٹو زرداری اور محترمہ فریال تالپور کے بااعتماد ساتھیوں میں شمار ہوتے ہیں۔
اب دیکھنا یہ ہے کہ چند ماہ کی حکومت میں وہ عوامی امنگوں پر کس حد تک پورا اتر سکیں گے۔ |
|
Post time 2025-11-15 02:21:16