|
|
— تصویر بشکریہ رپورٹر
پاکستانی سفیر برائے جاپان عبدالحمید نے 27 نومبر 2025 کو ٹوکیو کے شاہی محل میں ایک نہایت پروقار اور روایتی تقریب کے دوران اپنی اسنادِ سفارت شہنشاہِ جاپان کو پیش کیں۔
اس اہم سفارتی لمحے نے ناصرف دونوں ممالک کے دیرینہ اور خوشگوار تعلقات کو مزید تقویت دی بلکہ مستقبل میں تعاون کے نئے دروازے کھلنے کی امید بھی روشن کی۔
تقریب کے دوران سفیر عبدالحمید نے صدرِ پاکستان اور وزیرِ اعظم کی جانب سے شہنشاہِ جاپان کے لیے نیک خواہشات اور خیرسگالی کا خصوصی پیغام پہنچایا اور پاکستان کی جانب سے دوطرفہ تعلقات کو مزید مضبوط بنانے کے اعتماد کا اعادہ کیا۔
تقریب میں پاکستانی سفارتخانے کے افسران سید عرفان عباس شاہ （اقتصادی وزیر）، ایئر کموڈور یاسر شفیق ملک （دفاعی اتاشی）، چوہدری طلحہ بن خالد （سیاسی کونسلر）، مقرب مختار اعوان （پریس کونسلر）، مدیحہ علی （ٹریڈ اینڈ انویسٹمنٹ کونسلر） اور زہرہ دستگیر （کمیونٹی ویلفیئر اتاشی） بھی موجود تھے۔
جاپان کی جانب سے وزارتِ معیشت، تجارت و صنعت کے سینئر عہدیدار ریو سی آکازاوا سمیت دیگر اعلیٰ حکام نے شرکت کی، جس سے تقریب کی اہمیت مزید اجاگر ہوئی۔
اس ملاقات کو دونوں ممالک کے درمیان سفارتی روابط کے نئے اور مضبوط دور کا آغاز قرار دیا جا رہا ہے۔ |
|
Post time 2025-12-1 20:42:09