پاکستان ٹیلی ویژن انڈسٹری کی مشہور اداکارہ اور میزبان فضا علی نے ندا یاسر کے ڈلیوری رائیڈرز سے متعلق بیان پر شدید ردِعمل دیا ہے۔
پاکستان کی معروف مارننگ شو ہوسٹ ندا یاسر ایک بار پھر متنازع بیان کے باعث شدید تنقید کی زد میں آ گئیں، انہوں نے فوڈ ڈلیوری رائیڈرز سے متعلق سخت الفاظ استعمال کیے، جس کے بعد سوشل میڈیا پر تنقید کا سلسلہ شروع ہوگیا۔
ندا یاسر نے اپنے پروگرام میں کہا تھا کہ ڈلیوری رائیڈرز اکثر کھلے پیسے نہیں رکھتے اور یوں لوگوں کو زیادہ پیسے دینے پر مجبور کر دیتے ہیں، لوگوں کو ہمیشہ بالکل درست رقم تیار رکھنی چاہیے اور یہ رائیڈرز کی ذمہ داری ہے کہ باقی پیسے بھی واپس کریں۔
ان کے اس بیان پر اداکارہ فِضا علی نے کھل کر ان کی مخالفت کی اور ندا یاسر کو آڑے ہاتھوں لے لیا۔
فضا علی نے کہا کہ یہ رائیڈرز اندھیری راتوں میں، خطرناک موسم میں ہماری سہولت کے لیے باہر نکلتے ہیں، ہم مہنگا کھانا تو خرید لیتے ہیں مگر انہیں عزت دینا بھول جاتے ہیں، یہ بھی انسان ہیں، کسی کے بیٹے، کسی کے باپ، کسی گھر کے واحد کفیل ہیں، ان کا احترام کرنا ناگزیر ہے۔
انہوں نے کہا کہ لوگ کبھی یہ سوچتے بھی ہیں کہ ان رائیڈرز کے گھروں میں بھی کوئی اُن کا انتظار کر رہا ہوتا ہے؟ کوئی ماں اپنے بیٹے کا انتظار کرتی ہوگی، کوئی بچہ اپنے باپ کے جلد گھر آنے کی امید لیے بیٹھا ہوگا، کئی رائیڈرز کے پاس صرف ایک موٹر سائیکل ہوتی ہے اور وہ ہی ان کے کمانے کا ذریعہ ہوتی ہے۔
نِدا یاسر فوڈ ڈیلیوری رائیڈرز سے متعلق بیان پر تنقید کی زد میں
نِدا کے بیان پر انٹرنیٹ صارفین نے سخت ردعمل دیا
انہوں نے اس تلخ حقیقت کی طرف بھی نشاندہی کی کہ رائیڈرز کو جس بے ادبی اور بدتمیزی کا سامنا کرنا پڑتا ہے، وہ انتہائی افسوسناک ہے، ہمیں اگر بقایا نہ ملے تو غصہ آ جاتا ہے، آرڈر لیٹ ہو جائے تو بدسلوکی کر دیتے ہیں، ٹپ پر جھگڑ لیتے ہیں۔
فضا نے واضح کیا کہ ٹِپ دینا لازمی نہیں، لیکن کسی کو ذلیل کرنا بالکل غلط ہے، رائیڈرز مشینیں نہیں ہیں، وہ بھی انسان ہیں، اُن کے احساسات اور ذمہ داریاں ہیں، آج آپ کسی کے ساتھ نرمی کریں گے تو اللّٰہ آپ کے مشکل وقت میں آسانی کرے گا۔
فضا نے اس ذہنیت پر بھی تنقید کی کہ 500 روپے کا کھانا کھا لیتے ہیں مگر 20 روپے بھی عزت کے طور پر نہیں دیتے، ڈلیوری لیٹ ہو سکتی ہے، مگر انسانیت لیٹ نہیں ہونی چاہیے۔
Post time 2025-12-5 16:21:58
فائل فوٹوز 
