|
|
— فائل فوٹو
چین کے مشرقی شہر جی نان کی فیکٹری میں پیش آنے والے حادثے کے دوران خاتون کا کان کٹ گیا، بعدازاں اس کٹے ہوئے کان کو ڈاکٹروں نے خاتون کے پاؤں سے جوڑ دیا۔
غیر ملکی میڈیا رپورٹس کے مطابق تقریباً پانچ ماہ قبل پیش آنے والے ایک ہولناک حادثے میں مذکورہ خاتون کے بال فیکٹری کی مشینری میں پھنس گئے تھے۔ حادثے کے نتیجے میں ان کے سر، اور گردن کی جِلد کو شدید نقصان پہنچا اور بایاں کان مکمل طور پر الگ ہوگیا۔
حادثے کے بعد خاتون کو فوری طور پر اسپتال منتقل کیا گیا، جہاں ان کی جان تو بچالی گئی لیکن ڈاکٹروں نے متاثرہ کان کو خاتون کے پاؤں سے جوڑ دیا۔
چینی ڈاکٹروں کے مطابق اگر خاتون کا متاثرہ کان سرجری کے ذریعے اس کی اصل جگہ پر فوری طور پر لگایا جاتا تو خاتون کی خون کی نالیاں متاثر ہو سکتی تھیں، لہٰذا متاثرہ کان کے صحت مند ہونے تک خاتون کا کان عارضی طور پر اس کے پاؤں پر لگانے کا فیصلہ کیا گیا تھا۔
ان کا کہنا ہے کہ انسان کے پاؤں کی جِلد پتلی ہوتی ہے اور خون کی نالیاں ہم آہنگ ہونے کے سبب متاثرہ کان کے حصے میں خون کی گردش برقرار رکھنے میں مددگار تھیں اس لیے ہٹروٹوپک گرافٹنگ، 10 گھنٹے کا طویل آپریشن کر کے خاتون کا کان ان کے پاؤں سے جوڑ دیا گیا۔
ڈاکٹرز کے مطابق خاتون کے کان کی صحت کے لیے سرجری کے بعد کے ابتدائی دن تشویشناک رہے لیکن خون کا بہاؤ نارمل ہونے کے بعد کان کی جِلد کی رنگت ایک بار پھر نارمل ہونے لگی اور یوں ڈاکٹرز ٹرانسپلانٹ کرنے میں کامیاب ہوگئے۔
میڈیا رپورٹ کے مطابق اس سرجری کے بعد خاتون کی صحت پہلی جیسی ہونے میں 5 ماہ کا عرصہ لگا، اس دوران خاتون کا بایاں کان بھی اس کے پاؤں سے منسلک رہا، اس عرصے کے دوران خاتون نے باہر جانے کیلئے ڈھیلے جوتے استعمال کیے، ساتھ ہی خون کا بہاؤ تیز کرنے کیلئے تیز قدموں سے واک بھی جاری رکھی۔
بالآخر اکتوبر میں سرجنز کی ایک ٹیم خاتون کے کان کو اس کی اصل جگہ پر واپس لگانے کے قابل ہوگئی، اگرچہ یہ مرحلہ بھی مشکل ثابت ہوا لیکن ڈاکٹرز نے خاتون کا بایاں کان اس کی اصل جگہ پر لگا دیا۔ |
|
Post time 2025-12-14 15:30:20