آسٹریلیا میں دو سال قبل بیلجیم سے تعلق رکھنے والی لاپتہ خاتون کا موبائل فون مل گیا، پولیس نے اس پیشرفت کے بعد خاتون کی تلاش کے لیے منظم سرچ آپریشن شروع کردیا۔
پولیس کا کہنا ہے کہ سیلین کریمر جون 2023ء میں فلاسفر فالز کے قریب ویران علاقے میں لاپتہ ہو گئی تھیں، چند روز بعد پولیس کو ان کی گاڑی قریبی مقام سے ملی، تاہم متعدد سرچ آپریشنز کے باوجود ان کا کوئی سراغ نہ مل سکا۔
سیلین کریمر کے اہلِ خانہ اور دوست گزشتہ دنوں اس کی تلاش کے لیے پھر متحرک ہوگئے، جس کے دوران اس کا ایک ایسے علاقے سے موبائل فون برآمد ہوا جو پہلے بھی سرچ کیا جا چکا تھا، تسمانیہ پولیس نے تصدیق کی ہے کہ یہ فون سیلین کریمر ہی کا ہے اور اب اسے مزید فرانزک جانچ کے لیے بھیج دیا گیا ہے۔
پولیس انسپکٹر کے مطابق فون میں موجود ڈیٹا اور اس کی برآمدگی کی جگہ ہماری اس تھیوری کی تائید کرتی ہے کہ سیلین نے ممکنہ طور پر اپنے موبائل میں موجود ایپ کی مدد سے فلاسفر فالز کے مرکزی ٹریک کو چھوڑ کر اپنی گاڑی تک واپس جانے کے لیے ایک مختصر راستہ اختیار کیا، کیونکہ اس وقت دن کی روشنی کم ہو رہی تھی۔
79 سالہ لاپتہ خاتون کا جدید سائنسی طریقے سے پتہ لگا لیا گیا
حکام کے مطابق خاتون جب گھر نہ پہنچیں تو اہلِ خانہ پریشان ہو گئے
انہوں نے مزید کہا کہ ہمیں شبہ ہے کہ گھنے جنگلاتی علاقے میں ان کا فون گر گیا اور وہ اس کے بغیر آگے بڑھتی رہیں، جس کے باعث وہ راستہ بھٹک گئیں۔
آسٹریلین براڈکاسٹنگ کارپوریشن کے مطابق سیلین کریمر کے چار دوست بیلجیم سے آسٹریلیا پہنچے ہیں تاکہ اس نئے سرچ آپریشن میں حصہ لے سکیں، یہ تلاش اگلے پانچ دن تک جاری رہنے کی توقع ہے۔
واضح رہے کہ سیلین کریمر کو آخری بار 17 جون 2023ء کو دیکھا گیا تھا، جبکہ ان کے دوستوں نے 9 دن بعد ان کی گمشدگی کی اطلاع دی تھی۔
Post time 2025-12-15 18:09:21
تصویر:بین الاقوامی میڈیا 
