وفاقی وزیر اطلاعات عطا اللّٰہ تارڑ نے کہا ہے کہ سڈنی واقعے پر پاکستان کو بدنام کرنے کی مذموم کوشش کی گئی، فائرنگ میں ملوث شخص کو سڈنی میں بھارتی ہائی کمیشن نے پاسپورٹ جاری کیا تھا۔
غیرملکی میڈیا نمائندگان کو بریفنگ دیتے ہوئے عطا تارڑ نے کہا کہ سڈنی فائرنگ واقعے پر ڈس انفارمیشن پھیلائی گئی، بغیر شواہد اور تصدیق کے پاکستان مخالف پروپیگنڈا کیا گیا۔
انہوں نے کہا کہ کچھ ممالک کے میڈیا نے غلط رپورٹنگ کی، مستند چینلز کے ڈس انفارمیشن کا حصہ بننے پر افسوس ہے۔ خبر کی تصدیق سے متعلق صحافتی اقدار کو فراموش کیا گیا۔
سڈنی حملے میں ملوث بھارتی دہشتگرد ساجد اکرم اور بیٹے کا پاسپورٹ منظر عام پر آگیا
بھارتی نژاد دہشت گرد ساجد اکرم کا پاسپورٹ بھارتی سفارتخانہ نے 24 فروری 2022 کو 10سال کے لیے جاری کیا تھا۔
انہوں نے کہا کہ بھارت نے سڈنی واقعے کے فوری بعد پاکستان کے خلاف جھوٹا بیانیہ بنایا، آسٹریلوی پولیس نے تصدیق کی کہ حملہ آوروں کا تعلق بھارت سے ہے۔
عطا تارڑ نے کہا کہ فلپائن کے حکام نے بھی تصدیق کی ہے کہ حملہ آور نے بھارتی پاسپورٹ پر فلپائن کا دورہ کیا تھا۔
ان کا مزید کہنا تھا کہ پاکستان دہشتگردی کے خلاف جنگ لڑ رہا ہے اور بھارت دہشتگردی کو سپورٹ کر رہا ہے، پاکستان ہمیشہ امن کے ساتھ کھڑا رہا ہے اور امن کے ساتھ کھڑا رہے گا۔
Post time 2025-12-17 20:12:41
فوٹو: اسکرین گریب/جیو نیوز 
