|
|
کراچی کے علاقے مائی کلاچی کے قریب مین ہول سے 4 افراد کی لاشیں ملی ہیں، جن میں ایک مرد، 2 خواتین اور ایک بچہ شامل ہے۔
وزیراعلیٰ سندھ مراد علی شاہ نے لاشیں ملنے کا نوٹس لیتے فوری تحقیقات کا حکم دے دیا۔
ڈی آئی جی ساؤتھ اسد رضا نے بتایا کہ مائی کلاچی سے ملنے والی یہ لاشیں 10 سے 15 روز پرانی ہیں۔ لاشیں ضابطے کی کارروائی کیلئے اسپتال منتقل کردی گئی ہیں۔
پولیس کے مطابق ریسکیو حکام کو علاقہ مکینوں کی طرف سے ایک لاش کے مین ہول میں ہونے کی اطلاع ملی تھی، جسے نکالا گیا اور پتھر ہٹائے گئے تو مزید 3 لاشیں ملیں۔
پولیس حکام کا کہنا ہے کہ پوسٹ مارٹم رپورٹ میں موت کی وجہ معلوم ہوسکے گی، مین ہول میں لاشوں کو چھپانے کےلیے اینٹیں بھی ڈالی گئیں۔
حکام کا مزید کہنا ہے کہ ابتدائی تحقیقات کے مطابق لاشوں پر تشدد کے نشانات ہیں، جس مین ہول سے لاشیں ملی ہیں اس میں خون کے نشانات بھی ملے ہیں۔
دوسری جانب ریسکیو حکام نے تاحال اس بات کی تصدیق نہیں کی کہ ملنے والی لاشوں پر تشدد کے نشانات موجود ہیں، تفیشی ٹیم سی سی ٹی وی فوٹیج حاصل کرنے کی کوشش کر رہی ہے۔
وزیراعلیٰ سندھ نے نوٹس لے لیا
وزیراعلیٰ سندھ مراد علی شاہ نے مین ہول سے چار لاشیں ملنے کے واقعے کا نوٹس لے لیا اور پولیس و متعلقہ اداروں کو فوری تحقیقات کا حکم دے دیا۔
وزیراعلیٰ سندھ کا کہنا ہے کہ واقعے کے تمام پہلوؤں کا جائزہ لےکر ذمہ داروں کا تعین کیا جائے، سندھ حکومت متاثرہ خاندانوں کو انصاف فراہم کرے گی، شہریوں کے جان و مال کا تحفظ حکومت کی اولین ذمہ داری ہے۔
وزیر داخلہ سندھ نے تفصیلات طلب کرلیں
وزیر داخلہ سندھ ضیاء الحسن لنجار نے ایس ایس پی کیماڑی سے واقعے کی تفصیلات طلب کرلیں۔
وزیر داخلہ سندھ کا کہنا ہے کہ قتل کے پس پردہ محرکات، وجوہات اور عوامل کا باریک بینی سے تعین کیا جائے، ملوث عناصر کی جلد از جلد نشاندہی اور گرفتاری کو یقینی بنایا جائے اور ملزمان کوقانون کے مطابق کیفرِ کردار تک پہنچایا جائے۔ |
|
Post time 2026-1-3 05:58:38