|
|
ایران کے سپریم لیڈر آیت اللّٰہ خامنہ ای کا کہنا ہے کہ ایران دشمن کے سامنے نہیں جھکے گا، ہر گز پیچھے نہیں ہٹیں گے۔
امریکی صدر ڈونلڈ ٹرمپ کے ایران میں مداخلت سے متعلق بیان پر ردعمل میں خامنہ ای نے کہا کہ دشمن کو گھٹنے ٹیکنے پر مجبور کردیں گے۔
ایرانی وزیر خارجہ عباس عراقچی کا کہنا ہے کہ صدر ٹرمپ کو علم ہونا چاہیے کہ عوامی املاک پر مجرمانہ حملوں کو برداشت نہیں کیا جا سکتا۔ 
ایران پُرامن مظاہرین پر گولیاں برساتا ہے تو امریکا فوری بچاؤ کیلئے آئے گا، ڈونلڈ ٹرمپ
ایران میں مہنگائی اور کرنسی کی قدر میں تیزی سے گراوٹ کے خلاف مختلف شہروں میں 5 روز سے احتجاج جاری ہے اور یہ مظاہرے شدت اختیار کر گئے ہیں۔ 
انہوں نے کہا کہ امریکی صدر ٹرمپ کا پیغام غیر ذمہ دارانہ اور خطرناک ہے، ماضی کی طرح ایرانی عوام داخلی امور میں کسی بھی مداخلت کو مسترد کریں گے۔
وزیر خارجہ نے کہا کہ ایران کی مسلح افواج الرٹ ہیں، مسلح افواج ایرانی خود مختاری کی کسی بھی خلاف ورزی پر جانتی ہیں کہ کہاں نشانہ بنانا ہے، ایران میں زرِمبادلہ کی شرح میں اتار چڑھاؤ سے متاثرہ افراد احتجاج کر رہے ہیں، جو ان کا جائز حق ہے۔
خیال رہے کہ گزشتہ روز امریکی صدر ڈونلڈ ٹرمپ نے ایران میں جاری مظاہروں میں شریک افراد کے خلاف طاقت کے مبینہ استعمال پر مظاہرین کی مدد کیلئے آنے کی دھمکی دی تھی۔
اپنے سوشل میڈیا پلیٹ فارم ٹروتھ پر ٹرمپ نے ایک بیان جاری کیا جس میں انہوں نے ایران میں جاری مظاہروں کا تذکرہ کرتے ہوئے تہران کو براہ راست وارننگ دی تھی۔
ڈونلڈ ٹرمپ نے اپنے پیغام میں تحریر کیا تھا کہ اگر ایران پُرامن مظاہرین کو قتل کرتا ہے اور ان پر گولیاں برساتا ہے، جو اس کی روایت رہی ہے، تو امریکا ان لوگوں کے بچاؤ کو آئے گا۔ |
|
Post time 2026-1-4 05:24:12