|
|
 فوٹو بشکریہ بین الاقوامی میڈیا
امریکی شہر نیویارک سٹی میں تقریباً 15 ہزار نرسز نے بہتر کام کے لیے بہترین حالات مہیہ کرنے کے مطالبے پر ہڑتال شروع کردی جو شہر کی تاریخ میں نرسز کی سب سے بڑی ہڑتال قرار دی جا رہی ہے۔
ہڑتال پیر کی صبح اس وقت شروع ہوئی جب تین بڑے نجی اسپتالوں کی حکومتی نظام کے ساتھ معاہدے کے مذاکرات ناکام ہو گئے۔
نیویارک اسٹیٹ نرسنگ ایسوسی ایشن کے مطابق اسپتال انتظامیہ محفوظ اور میرٹ پر اسٹاف بھرتی کرنے، نرسوں کو ملنے والے صحت کے فوائد اور کام کی جگہ پر تشدد سے تحفظ جیسے بنیادی مسائل پر پیش رفت کرنے میں ناکام رہی۔
یونین کا الزام ہے کہ شہر کے امیر ترین اسپتال نرسوں کی ہیلتھ انشورنس میں کٹوتی کی دھمکی دے رہے ہیں۔
یونین کے مطابق اسپتال انتظامیہ ’نرس ٹو پیشنٹ‘ تناسب کے قوانین کو کمزور کرنا چاہتی ہے جو 2021ء میں کووڈ-19 کے بعد قانون کا حصہ بنے تھے۔ ان قوانین کے تحت ہر اسپتال میں اسٹافنگ کمیٹیاں اور خاص طور پر انتہائی نگہداشت یونٹس میں کم از کم ایک نرس پر دو مریضوں کی حد مقرر کی گئی تھی۔
نرسز کا یہ بھی کہنا ہے کہ کام کی جگہ پر تشدد میں اضافے کے باوجود انتظامیہ حفاظتی اقدامات، جیسے داخلی راستوں پر میٹل ڈیٹیکٹرز لگانے پر آمادہ نہیں، حالیہ مہینوں میں ماؤنٹ سائنائی اور نیویارک پریسبیٹیرین اسپتالوں میں فائرنگ کے واقعات نے ان خدشات کو مزید بڑھا دیا ہے۔
دوسری جانب نیویارک پریسبیٹیرین اسپتال نے کہا کہ وہ منصفانہ معاہدے کے لیے مذاکرات جاری رکھنے کو تیار ہے اور نرسز کی تنخواہوں میں نمایاں اضافے کی پیشکش بھی کی گئی ہے تاہم تفصیلات فراہم نہیں کی گئیں۔
ماؤنٹ سائنائی اور مونٹیفیور کی جانب سے کوئی باضابطہ بیان سامنے نہیں آیا ہے۔
واضح رہے کہ یہ ہڑتال شدید فلو سیزن کے دوران ہو رہی ہے جب اسپتالوں پر دباؤ پہلے ہی بہت زیادہ ہے۔
بین الاقوامی میڈیا کی ایک رپورٹ کے مطابق سیاسی طور پر بھی یہ ہڑتال اہم سمجھی جا رہی ہے، موجودہ حالات نرسوں کو مذاکرات میں اضافی طاقت فراہم کر سکتے ہیں۔
میئر ظہران ممدانی نے ہڑتال میں شریک ہو کر کہا اپنے بیان میں کہا کہ نرسوں کی محنت اور وقار پر کوئی سمجھوتہ نہیں ہونا چاہیے۔
اس ہڑتال سے نیویارک سٹی کی گورنر کیتھی ہوچول اور نئے منتخب میئر ظہران ممدانی دونوں پر دباؤ بڑھ گیا ہے کہ وہ نرسز کے مطالبات پر واضح مؤقف اختیار کریں۔ |
|
Post time