وزیراعلیٰ پنجاب مریم نواز کے بیٹے اور سابق وزیراعظم نواز شریف کے پوتے جنید صفدر کی شادی کی تیاریاں جاتِی اُمرا لاہور میں شروع ہوگئیں۔
جنید صفدر کی شادی شانزے علی روہیل سے ہوگی، جو پاکستان مسلم لیگ ن کے سینئر رہنما اور سابق رکن قومی اسمبلی شیخ روحیل اصغر کی پوتی ہیں۔
شادی کی تقریبات 16 جنوری 2026 سے شروع ہوں گی، جنید صفدر کی بارات 17 جنوری کو لیک سٹی جائے گی جبکہ ولیمہ کی تقریب 18 جنوری 2026 کو شریف فارمز جاتِی اُمرا میں دوپہر 1 بجے منعقد ہوگی۔
ویڈیو اور سوشل میڈیا پر گردش کرنے والے ولیمہ کے کارڈ کے مطابق تقریب 18 جنوری 2026 کو ہوگی، شریف خاندان کی جانب سے تقاریب کی تاریخ سے متعلق تصدیق یا تردید نہ ہوسکی۔
گزشتہ ماہ شیخ روحیل اصغر نے جنید صفدر کی دوسری شادی کی تصدیق کرتے ہوئے تقریبات کی کچھ تفصیلات بھی بتائیں تھیں۔
انہوں نے بتایا کہ میری پوتی شانزے اور جنید کی بہن ماہنور صفدر کی گہری دوستی ہے اور دونوں اکثر ایک دوسرے کے گھر جاتی رہتی ہیں، یہ یقین سے نہیں کہہ سکتا کہ ماہنور نے اپنے بھائی کے لیے اس شادی کا انتخاب کیا، لیکن شانزے اکثر مریم نواز سے ملتی رہتی تھیں، شاید اسی وجہ سے مریم نواز نے اس رشتے کے لیے اپنے بیٹے سے رابطہ کیا۔
مریم نواز کے بیٹے جنید صفدر کی دوسری شادی ن لیگی رہنما کی پوتی سے طے
روحیل اصغر نے مزید کہا کہ ایک دن وزیراعلیٰ مریم نواز کا میرے بیٹے کو پیغام آیا کہ ہم آپ کی طرف آنا چاہ رہے ہیں، پھر وہ لوگ آئے، اس کے بعد ہم گئے اور یوں رشتہ پکا ہوگیا۔
انہوں نے کہا کہ جب میرے بیٹے نے مجھ سے پوچھا، تو میں نے کہا کہ یہ خدا کی رحمت ہے کہ ہماری چھوٹی لڑکی اتنے معزز خاندان میں شادی کر رہی ہے اور میں نے اسے اس رشتے کو قبول کرنے کی حوصلہ افزائی کی۔
واضح رہے کہ جنید صفدر پہلے بھی شادی کر چکے ہیی، انہوں نے 2021 میں عائشہ سیف سے شادی کی تھی، مگر یہ رشتہ زیادہ عرصے تک قائم نہ رہ سکا اور دونوں اکتوبر 2023 میں علیحدہ ہوگئے۔
Post time 2026-1-15 16:57:56
فائل فوٹوز 
