|
|
 فائل فوٹو
امریکا نے پاکستان سمیت مختلف ممالک کے درخواست دہندگان کیلئے امیگرنٹ ویزا اجرا معطل کرنے کا اعلان کردیا۔
امریکی سفارتخانے کا کہنا ہے کہ ٹرمپ انتظامیہ کی توجہ اعلیٰ معیار یقینی بناتے ہوئے امریکی عوام کے تحفظ پر مرکوز ہے، 21 جنوری سے پاکستان سمیت مختلف ممالک کے درخواست دہندگان کیلئے امیگرنٹ ویزا اجرا معطل کیا جا رہا ہے۔
امیگرنٹ ویزا معطلی نئے درخواست گزاروں کی مکمل جانچ پڑتال کے عمل تک جاری رہے گی، امیگرنٹ ویزا درخواست گزاروں کو امریکی ویزا کیلئے اپنی مکمل اہلیت ثابت کرنا ہوگی۔
امریکی سفارتخانہ کا کہنا ہے کہ درخواست گزاروں کو یقین دہانی کروانا ہوگی کہ وہ سرکاری معاونت پر انحصار نہیں کریں گے، یہ اقدام صرف امیگرنٹ ویزا کے اجرا تک محدود ہے، نان امیگرنٹ ویزا درخواستوں پر اس فیصلے کا اطلاق نہیں ہوگا۔
سفارتخانہ کا کہنا ہے کہ سیاحتی، طلبا اور ان کے اہلخانہ کیلئے نان امیگرنٹ ویزا کا عمل معمول کے مطابق جاری رہے گا۔
خیال رہے کہ امریکی محکمہ خارجہ نے پاکستان سمیت 75 ممالک کے شہریوں کیلئے امیگرنٹ ویزا پراسیس روکنے کا فیصلہ کیا تھا۔
امریکی میڈیا کی رپورٹ کے مطابق متاثرہ ممالک میں صومالیہ، روس، ایران، افغانستان، برازیل، نائجیریا اور تھائی لینڈ، عراق، اردن، قازقستان، کویت، کرغزستان، لبنان، لیبیا، نیپال، کانگو، روانڈا، سوڈان ، شام، تنزانیہ، ازبکستان شامل ہیں۔
پاکستان، افغانستان، روس اور ایران کے لیے بھی امیگرنٹ ویزا پراسیس روک دیا گیا ہے۔ |
|
Post time 2026-1-17 01:28:54