سابق آسٹریلوی ٹیسٹ کرکٹر ڈیمین مارٹن نے کوما سے واپس آنے کے بعد پہلا بیان جاری کر دیا۔
ڈیمین مارٹن نے سوشل میڈیا پر اپنی صحت اور بیتے دنوں پر بات کی اور ساحل سمندر پر کھڑے ہو کر اپنی تصویر بھی شیئر کی۔
انہوں نے کہا کہ 27 دسمبر کو میری زندگی مجھ سے لے لی گئی تھی، میں اس خطرناک بیماری سے کوما کی حالت میں 8 دنوں تک لڑتا رہا۔
سابق آسٹریلوی کرکٹر ڈیمین مارٹن کو اسپتال سے ڈسچارج کردیا گیا
ڈیمین مارٹن کوما میں چلے گئے تھے اور آئی سی یو میں زیرِ علاج تھے۔
ان کا کہنا تھا کہ مجھے زندہ بچنے کے صرف 50/50 امکانات دیے گئے تھے، کوما سے واپس آنے کے بعد میں چلنے اور بولنے کے قابل نہیں تھا، اس کے 4 دن بعد میں نے ڈاکٹرز کو حیران کرتے ہوئے چلنا بھی شروع کیا اور بات بھی کی۔
ڈیمین مارٹن نے کہا کہ گھر واپس آنے اور ساحل سمندر کی ریت پر اپنے پاؤں رکھنے پر بےحد خوشی محسوس ہو رہی ہے، اُن تمام لوگوں کا شکریہ ادا کرتا ہوں جنہوں نے مشکل وقت میں مجھے اور میرے خاندان کو سپورٹ کیا۔
سابق آسٹریلوی کرکٹر کا کہنا تھا کہ اس تجربے نے مجھے یہ یاد دلایا کہ زندگی کتنی نازک ہے، سب کچھ کتنی تیزی سے بدل سکتا ہے اور وقت کتنا قیمتی ہے، 2026 کے لیے تیار ہو جاؤ… میں واپس آ گیا ہوں۔
واضح رہے کہ کرسمس ڈے پر ڈیمین مارٹن کی گردن توڑ بخار کی وجہ سے حالت تشویشناک ہو گئی تھی وہ کوما میں چلے گئے تھے اور برسبین کے اسپتال میں آئی سی یو میں رہے۔
ڈیمین مارٹن 2003 کے ورلڈ کپ کی فاتح ٹیم کے رکن تھے، انہوں نے 67 ٹیسٹ میچز میں آسٹریلیا کی نمائندگی کی جبکہ انہوں نے 208 ون ڈے اور 4 ٹی ٹوئنٹی میچز بھی کھیلے۔
Post time 2026-1-17 19:40:01
فوٹو بشکریہ سوشل میڈیا 
