|
|
گورنر پنجاب سردار سلیم حیدر خان نے بیرونِ ملک مقیم پاکستانیوں پر زور دیا ہے کہ وہ ملک کے خلاف منفی پروپیگنڈا سے گریز کریں اور قومی یکجہتی کو فروغ دیں۔
پیرس میں ایک تقریب سے خطاب کرتے ہوئے سردار سلیم حیدر خان نے کہا کہ پاکستان اللہ تعالیٰ کے فضل و کرم سے ترقی کی راہ پر گامزن ہے اور ہمیں سب سے پہلے اپنی فوج کے لیے دعاگو رہنا چاہیے جو سرحدوں پر ہماری جان و مال کے تحفظ کے لیے ہمہ وقت تیار رہتی ہے۔
گورنر پنجاب کا کہنا تھا کہ حکومتیں آتی جاتی رہتی ہیں، مگر پاک فوج ریاستِ پاکستان کی سلامتی کی ضامن ہے۔
انہوں نے قائدِ عوام ذوالفقار علی بھٹو کی قومی خدمات کو خراجِ تحسین پیش کرتے ہوئے کہا کہ بھٹو شہید نے پاکستان کے دفاع کو ناقابلِ تسخیر بنانے کے لیے ایٹمی پروگرام کی بنیاد رکھی، جسے بعد ازاں میاں نواز شریف نے پایۂ تکمیل تک پہنچایا اور ایٹمی دھماکوں کے ذریعے پاکستان کو دنیا کی ایٹمی طاقت کے طور پر منوایا۔ آج پاکستان کا مضبوط اور محفوظ ہونا اسی تاریخی فیصلے کا ثمر ہے۔
سردار سلیم حیدر خان نے حالیہ پاک بھارت جنگ کا حوالہ دیتے ہوئے کہا کہ پاک فوج نے دلیری اور پیشہ ورانہ مہارت کے ساتھ دشمن کا مقابلہ کیا، بھارت کو شکستِ فاش دی اور عالمی سطح پر پاکستان کا وقار مزید بلند کیا۔
قبل ازیں تقریب کےلیے آمد پر گورنر پنجاب کا پرتپاک استقبال کیا گیا اور انہیں پھولوں کے ہار پہنائے گئے۔ ان کے اعزاز میں شاندار عشائیہ دیا گیا، جس میں فرانس کی معروف سیاسی، سماجی اور کاروباری شخصیات نے بڑی تعداد میں شرکت کی۔ 
اس پروقار تقریب میں فرانس کی معروف سیاسی، سماجی اور مذہبی شخصیت روحی بانو، سعدیہ فریاد سمیت اپنی خواتین ٹیم کے ہمراہ شریک ہوئیں اور تقریب میں پاکستان پیپلز پارٹی فرانس کی بھر پور نمائندگی کی جبکہ تقریب کی میزبانی پاکستان بزنس فورم فرانس و یورپ نے کی۔
پاکستان مسلم لیگ （ن） فرانس کے چیئرمین راجہ علی اصغر، پاکستان بزنس فورم کے صدر حاجی اسلم، جنرل سیکرٹری سلمان اسلم اور چیئرمین یورپ سردار ظہور اقبال نے گورنر پنجاب کو خوش آمدید کہتے ہوئے ان کی خدمات کو سراہا اور خراجِ تحسین پیش کیا۔
یہ باوقار تقریب ’’پاک فوج زندہ باد‘‘ اور ’’پاکستان پائندہ باد‘‘ کے فلک شگاف نعروں اور شاندار عشائیے کے ساتھ اختتام پذیر ہوئی۔ |
|
Post time 2026-1-18 00:13:33