پاکستان نے 4 سال بعد عالمی بانڈ مارکیٹ میں واپسی کی تیاری کرلی۔
وفاقی وزیرِ خزانہ محمد اورنگزیب کا کہنا ہے کہ حکومت آئندہ چند ہفتوں میں مالی مشیروں کے انتخاب کے لیے تجویز جاری کرے گی۔
اپنے بیان میں انہوں نے کہا کہ حکومت ڈالر، یورو یا اسلامی سکوک بانڈ جاری کرنے کا جائزہ لے رہی ہے، جلد ہی تاریخ کا پہلا پانڈا بانڈ بھی متعارف کرانے کی تیاری کررہے ہیں۔
وزیر خزانہ نے کہا کہ ڈیووس ورلڈ اکنامک فورم میں پاکستانی وفد کی قیادت وزیراعظم شہباز شریف کررہے ہیں، یہ عالمی سرمایہ کاروں کے لیے پیغام ہے کہ پاکستان کی معیشت بہتر ہوچکی ہے۔
اسلام آباد، لاہور اور کراچی کے ہوائی اڈوں کی نجکاری پر کام جاری ہے، وزیر خزانہ
وزیر خزانہ نے سعودی ہم منصب سے دیرینہ اقتصادی شراکت داری مضبوط بنانے کے امکانات پر بھی گفتگو کی۔
ان کا مزید کہنا تھا کہ پاکستان نے معاشی استحکام کے میدان میں اہم کامیابیاں حاصل کی ہیں، مہنگائی، شرحِ سود اور کرنٹ اکاؤنٹ سمیت تمام معاشی اشاریے بہتر سمت میں جارہے ہیں۔
محمد اورنگزیب نے کہا کہ آئی ایم ایف کے پروگرامز کے تحت سخت مالی اصلاحات کی گئیں جس کے باعث عالمی ریٹنگ ایجنسیوں نے پاکستان کی درجہ بندی میں بہتری کی ہے۔
وزیر خزانہ نے کہا کہ زرمبادلہ کے ذخائر جون تک 3 ماہ کی درآمدات کے برابر ہونے کی توقع ہے، روپے پر فوری دباؤ نہیں ہے کیونکہ ادائیگیوں کا توازن بہتر ہوا ہے۔
وزیر خزانہ نے مزید کہا کہ ترسیلاتِ زر میں اضافہ ہوا ہے اور سروسز کی برآمدات بڑھ رہی ہیں، روپیہ گزشتہ تقریباً ڈیڑھ سال سے مستحکم ہے۔
وزیر خزانہ محمد اورنگزیب نے کہا کہ حکومت نیویارک کے روز ویلٹ ہوٹل میں اپنا حصہ فروخت کرنے پر غور کر رہی ہے، بڑے ہوائی اڈوں کے انتظامات آؤٹ سورس کرنے پر بھی غور ہورہا ہے۔
انہوں نے کہا کہ حکومت تقریباً 2 درجن دیگر سرکاری اداروں کی نجکاری پر بھی غور کر رہی ہے، اصلاحات کے راستے پر قائم رہنا ہوگا کیونکہ یہی پائیدار ترقی کا واحد حل ہے۔
Post time 2026-1-20 21:08:19
فائل فوٹو 
