پاکستان سپر لیگ （ پی ایس ایل） کے میچز پہلی بار پشاور کے عمران خان کرکٹ اسٹیڈیم میں بھی کرانے کا فیصلہ کر لیا گیا۔
یہ فیصلہ خیبر پختون خوا میں سیکیورٹی سے متعلق اعلیٰ سطح کے اجلاس میں کیا گیا۔
پشاور میں ہونے والے اجلاس کے بعد چیئرمین پی سی بی محسن نقوی نے انٹر اسکولز کرکٹ ٹورنامنٹ کے فائنل میں شرکت کی، جہاں انہوں نے تقریب سے خطاب کرتے ہوئے کہا کہ قومی ٹیم کے 60 فیصد کھلاڑیوں کا تعلق خیبر پختون خوا سے ہے، جو صوبے میں موجود ٹیلنٹ کا واضح ثبوت ہے۔
مقصد صرف بنگلادیش کو عزت دلانا تھا، بی سی بی کے تمام مطالبات مانے گئے، محسن نقوی
پشاور میں میڈیا سے گفتگو کرتے ہوئے چیئرمین پی سی بی کا کہنا تھا کہ ہمارا مقصد بنگلادیش کے ساتھ ہونے والی ناانصافی کو اجاگر کرنا تھا۔
انہوں نے کہا کہ ہماری ٹیم کے 60 فیصد کھلاڑی خیبر پختون خوا سے ہیں، یہاں بے پناہ ٹیلنٹ موجود ہے، اسی لیے ہم خیبر پختون خوا کے لیے 2 ٹیمیں بنانے جا رہے ہیں تاکہ زیادہ سے زیادہ کھلاڑیوں کو آگے آنے کا موقع مل سکے۔
محسن نقوی نے ورلڈ کپ میں بھارت کے خلاف میچ کے بائیکاٹ سے متعلق گفتگو کرتے ہوئے کہا کہ اس فیصلے کا مقصد صرف بنگلا دیش کو عزت دینا تھا اور اس کے پیچھے کسی قسم کی شرط یا دباؤ شامل نہیں تھا۔
انہوں نے کہا کہ پاکستان کرکٹ بورڈ کا فوکس صرف اور صرف کھیل اور کھلاڑیوں کی بہتری پر ہے۔
ان کا یہ بھی کہنا ہے کہ پاکستان کے لیے سب سے پہلے قومی مفاد ہے، اس کے بعد باقی تمام معاملات آتے ہیں۔
واضح رہے کہ پی ایس ایل کا 11 واں ایڈیشن 26 مارچ سے 3 مئی تک جاری رہے گا۔
Post time 2026-2-13 00:12:52
