حکومت پاکستان نے قومی کرکٹ ٹیم کو ٹی ٹوئنٹی ورلڈکپ 2026 میں بھارت کے خلاف میچ کھیلنے کی اجازت دے دی۔
حکومت پاکستان کی جانب سے جاری اعلامیہ میں کہا گیا کہ ٹی 20 ورلڈکپ میں پاکستان بھارت کے ساتھ میچ کھیلے گا۔ قومی ٹیم کو 15 فروری کو شیڈول کے مطابق میچ کھیلنے کا کہہ دیا گیا ہے۔
اعلامیہ کے مطابق میچ کھیلنے کا فیصلہ کرکٹ کی روح کے تحفظ کےلیے کیا گیا۔
بیان میں مزید کہا گیا کہ بنگلادیش کرکٹ بورڈ （بی سی بی） کی باضابطہ درخواست کا جائزہ لیا گیا، حکومت کا فیصلہ عالمی کرکٹ کے تسلسل اور کھیل کے فروغ کےلیے کیا گیا۔
بنگلادیش کرکٹ بورڈ کی جانب سے پاکستان کا شکریہ
بنگلادیش کرکٹ بورڈ نے بیان جاری کرتے ہوئے پی سی بی چیئرمین کا خاص طور پر شکریہ ادا کرتے ہوئے کہا کہ انہوں نے اس دوران ہمارا ساتھ دیا۔
حکومت پاکستان کے بیان میں کہا گیا کہ وزیراعظم اور قوم گرین شرٹس کےلیے نیک تمناؤں کا اظہار کیا ہے۔
اس سے قبل وزیراعظم شہباز شریف نے چیئرمین پاکستان کرکٹ بورڈ （پی سی بی） محسن نقوی کو ٹی ٹوئنٹی ورلڈکپ 2026 میں پاک بھارت میچ کھیلنے کےلیے گرین سگنل دیا۔
ذرائع کا کہنا تھا کہ چیئرمین پی سی بی محسن نقوی نے وزیراعظم شہباز شریف سے رابطہ کیا۔ محسن نقوی نے وزیراعظم کو بنگلادیش کرکٹ بورڈ （بی سی بی） کے موقف سے بھی آگاہ کیا۔
ذرائع نے بتایا کہ وزیراعظم نے پاک بھارت میچ کھیلنے کے حوالے سے چیئرمین پی سی بی کو گرین سگنل دیا۔ پاکستان کا بھارت کے ساتھ میچ کھیلنے سے متعلق حتمی اعلان کچھ دیر میں ہوگا۔
ہم تو ہر وقت اچھی خبر کے لیے تیار رہتے ہیں: محسن نقوی
سری لنکن صدر کی درخواست پر پاکستان کا بھارت کیخلاف ٹی20 ورلڈکپ میچ کھیلنے کا فیصلہ، ذرائع
ذرائع کا کہنا ہے کہ پاکستان اور بھارت کی ٹیمیں شیڈول کے مطابق ٹی ٹوئنٹی ورلڈ کپ 2026 کا میچ کھیلیں گی۔
ادھر لاہور میں صحافیوں سے غیر رسمی گفتگو کرتے ہوئے چیئرمین پی سی بی محسن نقوی کا کہنا تھا کہ پاک بھارت میچ سے متعلق کچھ دیر میں فیصلہ ہو جائے گا۔
انہوں نے کہا کہ ہم تو ہر وقت اچھی خبر کے لیے تیار رہتے ہیں۔ بنگلادیش نے ہم سے درخواست کی ہے کہ میچ کھیلیں۔ بنگلادیش کے آئی سی سی سے معاملات حل ہونے چاہئیں۔
محسن نقوی کا یہ بھی کہنا تھا کہ ہم نے بنگلادیش کےلیے اسٹینڈ لیا تھا اور ان کی ہی بات کی ہے۔
وزیراعظم کو چیئرمین پی سی بی کی بریفنگ
وزیرِاعظم شہباز شریف کو محسن نقوی نے پی سی بی، بی سی بی اور آئی سی سی کے مذاکرات پر بریفنگ دی۔
اس حوالے سے جاری اعلامیہ کے مطابق بریفنگ میں بتایا گیا کہ بنگلا دیش کرکٹ بورڈ نے پاکستان سے مسئلے کے حل کےلیے تعاون مانگا۔ سری لنکا اور یو اے ای سمیت دیگر ممالک نے پاکستان کی حمایت کی۔
اعلامیہ کے مطابق پاکستان نے بنگلادیش کے ساتھ مکمل تعاون کی یقین دہانی کروا دی۔ وزیرِاعظم شہباز شریف سے سری لنکن صدر سے ٹیلیفونک رابطہ ہوا، انہوں نے موجودہ معاملہ خوش اسلوبی سے حل کرنے پر زور دیا۔
اعلامیہ کے مطابق حکومتِ پاکستان نے قومی کرکٹ ٹیم کو ٹی ٹوئنٹی ورلڈکپ کھیلنے کی ہدایت کی، قومی ٹیم 15 فروری 2026 کو شیڈول میچ کھیلے گی۔
Post time 2026-2-13 02:51:11
