|
|
پاکستان واپڈا نے سنسنی خیز مقابلے کے بعد کئی بار قومی ٹورنامنٹ جیتنے والی خان ریسرچ لیبارٹریز （کے آر ایل） کو شکست دیکر نیشنل چیلنج کپ فٹ بال ٹائٹل اپنے نام کرلیا۔
اس کامیابی کے ساتھ واپڈا نے مسلسل تیسری بار یہ ٹائٹل جیت کر اپنی ہیٹ ٹرک بھی مکمل کرلی، میچ کا واحد اور فیصلہ کن گول محمد ثمنان نے کیا۔
فائنل دیکھنے کیلئے شائقین کی بڑی تعداد گراؤنڈ میں موجود تھی۔ تیسری پوزیشن کے میچ میں ایس اے گارڈنز نے پینلٹی ککس پر پاکستان آرمی کو شکست دی۔
فاتح واپڈا کو 10 لاکھ روپے کی انعامی رقم اور خوبصورت ٹرافی، رنرز اپ کے آر ایل کو ساڑھے سات لاکھ روپے اور ٹرافی جبکہ تیسری پوزیشن حاصل کرنے والی ایس اے گارڈنز کی ٹیم کو 5 لاکھ روپے کی انعامی رقم دی گئی۔ 
ٹورنامنٹ کی اختتامی تقریب کے مہمان خصوصی پاکستان فٹ بال فیڈریشن کے سربراہ محسن گیلانی، شاہد کھوکھر، سندھ فٹ بال کے صدر اعظم خان، پی ایف ایف کے نائب صدور ڈاکٹر محمد علی شاہ، حافظ ذکاء اللّٰہ، عابد حسین （بدی）، کرنل （ر） محمد نعمان اور دیگر بھی موجود تھے۔
میچ کے کک آف کا صحیح وقت معلوم نہ ہونے پر قومی فٹ بال ٹیم کے ہیڈ کوچ نولبرٹو سولانو آدھے گھنٹے کی تاخیر سے گراؤنڈ پہنچے، میچ کا صحیح وقت بتائے نہ جانے پر وہ اپنے کوچنگ اسٹاف اور پی ایف ایف کے عہدیداروں پر برس پڑے۔
ان کا کہنا تھا کہ انہیں فائنل میں کھلاڑیوں کی پرفارمنس کا جائزہ لینا تھا لیکن میچ کے صحیح وقت کی کمیونیکیشن نہ ہونے پر وہ میچ سے قبل نہیں پہنچ سکے۔
قبل ازیں کھیلے گئے تیسری پوزیشن کے میچ میں ایس اے گارنرز نے پاکستان آرمی کو پینلٹی ککس پر شکست دی۔ |
|
Post time