سابق بھارتی کپتان سارو گنگولی نے بھی بانیٔ پی ٹی آئی کے لیے اپنی نیک خواہشات کا اظہار کیا ہے۔
سارو گنگولی نے بھارتی میڈیا سے گفتگو کے دوران بانیٔ پی ٹی آئی کی صحت سے متعلق سامنے آنے والی خبروں کے بارے میں پوچھے گئے سوال کا جواب دیتے ہوئے کہا کہ مجھے امید ہے کہ ان کی صحت ٹھیک ہو جائے گی اور ان کا صحیح علاج ہو گا۔
اُنہوں نے کہا کہ بانیٔ پی ٹی آئی نے پاکستان کرکٹ ٹیم کے کپتان اور پھر پاکستان کے وزیرِ اعظم کے طور پر دنیا بھر میں اپنے ملک کا نام روشن کیا تو مجھے یقین ہے کہ ان کو علاج کی مناسب سہولتیں اور عزت ملنی چاہیے۔
سابق پاکستانی کرکٹ لیجنڈز کی حکام سے بانیٔ پی ٹی آئی کا بر وقت علاج کروانے کی اپیل
پاکستان کے سابق کرکٹ لیجنڈز نے حکومت سے اپیل کی ہے کہ جیل میں قید بانیٔ پی ٹی آئی کا مناسب علاج کروایا جائے۔
اس سے قبل دنیائے کرکٹ کے سابق کپتانوں نے بانیٔ پی ٹی آئی کے لیے انسانی بنیادوں پر حکومتِ پاکستان سے اپیل کی تھی۔
بانیٔ پی ٹی آئی سے متعلق اپیل کرنے والے کپتانوں کی فہرست میں سرکلائیو لائیڈ، گریگ چیپل، ائین چیپل، ایلن بارڈر، مائیکل بریئرلے، مائیکل ایتھرٹن، بیلنڈا کلارک، سنیل گواسکر، ڈیوڈ گاوور، کم ہیوز، ناصر حسین، کپل دیو، اسٹیو وا اور جان رائٹ شامل ہیں۔
علاوہ ازیں پاکستان کے سابق کرکٹرز وسیم اکرم، شعیب اختر، رمیز راجہ، وقار یونس، اور شاہد آفریدی نے بھی حکام سے بانیٔ پی ٹی آئی کا مناسب علاج کروانے کی اپیل کی ہے۔
Post time 2026-2-19 15:28:43
—فوٹو بشکریہ سوشل میڈیا 
