|
|
 فائل فوٹو
خیبر پختونخوا حکومت نے کفایت شعاری مہم کے فیصلے سے متعلق اعلامیہ جاری کر دیا۔
اعلا میے کے مطابق 2 ماہ تک کفایت شعاری کی ہدایات پرعملدرآمد یقینی بنایا جائے گا، خیبرپختونخوا میںاس دوران تعلیمی ادارے ہفتہ اور جمعہ کو بند رہیں گے جبکہ جامعات بھی آن لائن کلاسز کے لیے منصوبہ بندی کریں ۔
صوبائی حکومت کے اعلامیے میں کہا گیا کہ پشاور ہائی کورٹ کو کیسز کی سنوائی کے لیے ورچول انتظامات کرانےکی سفارش کی گئی ہے۔
اعلامیے میں کہا گیا کہ انتظامیہ دفتری اوقات کو متعین کرکے ٹریفک مسائل میں کمی لائیںجبکہ ضلعی انتظامیہ شادی ہالز ، بازار اور مارکیٹوں میں غیر ضروری توانائی کے استعمال کو کم کرے۔
خیبر پختونخوا حکومت کے اعلامیے میں ضلعی انتظامیہ کو رات گئے شادی ہالز میں تقریبات پر پابندی کی ہدایت کی گئی اور کہا گیا کہ ٹول اور پبلک روڈز کے ٹیکسز میں اضافہ نہ کیا جائے۔
اعلامیے میں بتایا کہ صوبائی محکمہ ٹرانسپورٹ کو کرایوں میں اضافے کے معاملے پر نظر رکھنے کی ہدایت کی۔
صوبائی حکومت نے کابینہ اجلاسوں کو آن لائن کرنے کا فیصلہ کیا اور کہا گیا کہ جہاں تک ممکن ہو صوبائی اسمبلی اور قائمہ کمیٹی کے اجلاسوں کو ورچوئل منعقد کیا جائے۔
اعلامیے کے مطابق ـ پروٹوکول گاڑیوں کے قافلوں میں کمی، غیر ضروری فرنیچر، آلات کی سرکاری خریداری محدود کیا جائے جبکہ پولیس، ریسکیو اور فیلڈ آپریشنز کی گاڑیوں کو ایندھن میں کمی سے استثنیٰ حاصل ہوگا۔
خیبر پختونخوا حکومت کے اعلامیے کے مطابق سرکاری اجلاسوں کو ورچوئل کرنے سمیت بین الاضلاعی سرکاری سفر کم کرنے کا فیصلہ کیا گیا ہے۔
اعلامیے میں پیٹرول کی ذخیرہ اندوزی اور بلیک مارکیٹنگ کے خلاف سخت کارروائی کرنے کی ہدایت کی گئی ہے۔
اعلامیے کے مطابق گندم کی کٹائی کے دوران ڈیزل کی فراہمی یقینی بنانے کے لئے خصوصی اقدامات کیے جائیں گے، ضلعی انتظامیہ پٹرول پمپس پر روزانہ کی بنیاد پر اسٹاک کا معائنہ کرے گی، بلیک مارکیٹنگ اور زیادہ پیسے لینے والوں کے خلاف کارروائی کی جائے۔
صوبائی حکومت کے اعلامیے میں کہا گیا کہ تمام اضلاع فیول کی دستیابی، عمل درآمد سے متعلق اقدامات کی رپورٹ روزانہ صوبائی حکومت کو بھیجیں گے۔
اعلامیے کے مطابق چیف سیکریٹری آفس میں صوبائی مانیٹرنگ ڈیسک قائم کیا جائے گا، کفایت شعاری اقدامات پر عمل درآمد کی پیشرفت رپورٹ کا جائزہ لیا جائے گا اور ضرروت کے مطابق رپورٹس وزیراعلیٰ خیبر پختونخوا کو پیش کی جائیں گی۔ |
|
Post time 2026-3-10 04:42:51